Djasabra 23 di novèmber último, a tuma lugá e di seis kompetensia di ortografia na hulandes ku Fundashon Lesa Ta Dushi ta organisá pa muchanan di 12 pa 14 aña. E kompetensia a tuma lugá na Liseo Boneriano. Gezaghèber interino señor Curvin Georege a hasi apertura di e kompetensia despues di a hiba tremendo palabranan pa enkurashá tantu e kandidatonan komo e organisashon di FLTD. Ocho kandidato: Jhugarnique Raphaela, Rechainy Menzies, Jamila Christiaan, Rushainy Goeloe, Kyanthe Jano, Destheny Janzen, Jemal Trouwloon i Najur Alberto a partisipá na e kompetensia importante aki ku e fundashon ta organisá pa motivá e grupo akí tambe pa lesa. Tur kandidato tabata bon prepará dor di nan dosentenan di Pienter voor Taal. Huradonan tabata Lucretia Leming, Giovanna Winklaar i Vivian Wensinck. Maestro di Seremonia tabata Fernon Koeiman, miembro di FLTD. E kompetensia tabatin tres ròndu. Dos kandidato a bai final, Jamila Christiaan i Jemal Trouwloon. Ku por sierto a hiba un tremendo bataya, ku finalmente Jamila ta gana e kompetensia. Pues tur dos finalista tabata hopi fuerte. Na di tres lugá a sali Rechainy Menzies. Durante e kompetensia a hasi entrega di premio pa e kompetensia ‘Huki di buki mas atraktivo den klas’ pa maestronan di skolnan básiko. Durante siman di buki e maestronan ku a kompetí mester a manda un presentashon di nan huki di buki. E presentashon a ser butá riba página di Facebook di FLTD i esun ku tabatin mas ‘like’ a gana. Tres maestro, Katty Thielman, Jeanne Goeloe i Georgine-Ann Conquet a manda nan presentashon. Tabata esun di yùf Katty Thielman ku a risibí mas tantu ‘like’ ku su bunita presentashon kon su muchanan a biba e Siman di buki. FLTD ta gradisí su spònsernan pa nan gran aporte p’asina e kompetensia por a bira un éksito. E spònsernan ta City Shop, Biblionef, Smart Teaching & Learning i Edukativa. Tambe ta gradisí tur partisipante, Pienter voor taal i direktiva di SGB pa uso di lokalidat na Liseo Boneriano. Un danki spesial na tur mayor ku a bin apoyá nan yu durante e presentashon. Boso presensia ta altamente apresiá i di gran balor pa boso yu i nos fundashon. FLTD lo sigui ku su lucha pa konsientisá tantu nos muchanan komo mayornan ku lesamentu ta hopi importante pa desaroyo di nos muchanan di Boneiru. Nos lema ta: “Un mucha ku ta lesa, ta bira un adulto ku ta pensa!” 

Direktiva di FLTD 


Share This
error: Content is protected !!