Ta sumamente importante e papel di mayornan pa yuda stimulá i guia e mucha den su desaroyo.  Si un  mucha no ta haña sufisiente oportunidat p’e move, su desaroyo motóriko por keda atras. Duna e mucha espasio pa e mes hasi sierto kosnan, sin ku esaki ta un peliger p’e,  lo ta hopi bon pa su desaroyo.

Djasabra 16 di novèmber  ‘Opstap Opnieuw’ tabatin e tayer titulá ‘Kon pa stimulá desaroyo motóriko serka mi yu(nan)’.  E aktividat a tuma lugá na Sentro pa Hubentut i Famia for di 10’or pa 12’or. 

Algun tep ku Yùfrou Zulaika di Skol Amplio Papa Cornes, a kompartí  ku tur mayor presente tabata: 

  • Papia hopi ku e muchanan, 
  • kompartí tempu i hunga ku nan

Alabes señora Nymphette Josephia a realisá un par di wega huntu ku e muchanan,  pa siña nan konsentrá i fortalesé nan trahamentu den grupo pa medio di moveshon i wega. 

Sentro Hubentut i Famia ta gradisí un i tur ku a partisipá durante e tayer.  

Opstap Opnieuw ta un proyekto di Sentro pa Hubentut i Famia.  E proyekto ta bou di guia di mamanan di bario, Jovianca Martis, Lu-Ann Engelhart i Arelis Goeloe,  ku semanalmente ta hiba tarea pa mayor na kas.  Mayornan na nan turno ta hasi e tarea ku nan yu (4 te 6 aña) tur dia pa mas o ménos 15 minüt.  Asina mayornan por pasa tur dia ratunan plasentero i sigui desaroyo di nan yu djaserka.  E proyekto ta wordu  kordiná dor di señora Carla Oleana.

Pa mas informashon, por tuma kontakto na telefòn 7157200 òf bishita nos Facebook page ShiF Bonaire i Derecho di Mucha Bonaire. 

Share This
error: Content is protected !!