Kralendijk – Empresarionan den hóreka mester entregá nan petishon pa un orario di sera mas lat den temporada di Pasku i Aña Nobo pa mas tardá dia 3 di desèmber 2019. (Lei ‘Winkelsluiting BES, staatsblad 2010-443’) Esaki Kolegio Ehekutivo di Entidat Públiko Boneiru a anunsiá. Mester manda tur petishon pa departamentu di ‘Post en Archief’ na Kaya Aruba 1. Tambe empresarionan mester manda un kopia di e petishon pa Direktorado di Planifikashon i Desaroyo, departamentu di maneho i proyekto na Kaya Amsterdam 23.

Durante e dianan rònt di Pasku i Aña Nobo mas i mas empresario den hóreka ke sera nan negoshi na un orario mas lat ku ta pèrmití. Eksperensia ta mustra ku nan ta warda te na último momentu pa entregá nan petishon. Esei ta okashoná problema pa e servisionan di Entidat Públiko Boneiru i Kuerpo Polisial Hulanda Karibense ku ta trata e petishonnan. Hopi petishon ta drenta na mes momentu serka nan. I netamente den e periodo aki hopi di nan trahadónan ta liber. Pa e motibu ei hopi biaha e servisionan no por prosesá e petishonnan na tempu.

Ku un fecha mas tardá di entregá e petishon gobiernu ta haña un bista na tempu di e kantidat di petishonnan ku a keda entregá. I tambe gobièrnu ta haña sa kua ta e negoshinan di hóreka ku den temporada di Pasku i Aña Nobo ke sera mas lat. E ora ei gobièrnu tin mas tempu pa kontrolá si e petishonnan ta kumpli ku e eksigensianan di mantenshon di òrden públiko, trankilidat i siguridat. Si ta nesesario, por adaptá e planifikashon pa mantenshon di órden públiko, trankilidat i siguridat durante dianan di fiesta.

Entidat Públiko Boneiru no ta trata petishonnan ku drenta despues di 3 di desèmber 2019.

Pa mas informashon tuma kontakto ku Direktorado di Planifikashon i Desaroyo, departamentu di maneho i proyekto, Kaya Amsterdam 23, number di telefon 717 5330 ekstenshon 5045 òf 5046.      

Share This
error: Content is protected !!