Den nomber di Gobierno di Aruba, Prome Minister Evelyn Wever-Croes ta informa cu e frontera entre Aruba y Venezuela ta keda cera por lo pronto. E decision aki ta basa riba e siguiente argumentonan.

Gobierno di Aruba ta sigui e desaroyo na Venezuela hopi di cerca. E situacion ta dificil y miyones di habitante ta purba sali di e pais. Desde 2015, 4.5 miyon Venezolano a bandona nan pais, y pronto e total lo surpasa 5 miyon. E impacto di e crisis di Venezuela den e pais ta inmenso y e impacto riba e paisnan cu ta den cercania di Venezuela ta hopi serio. Entre nan Aruba, cu ta hopi cerca di Venezuela.

Gobierno di Aruba ta purba atende cu e crisis aki lo miho posibel.

Na Aruba tin miles di persona di Venezuela. 

Banda di esey, actualmente nos tin como 2 mil peticion pa asilo y ta purba atende cu diligicencia teniendo cuenta cu tratadonan internacional di derechonan humano.

E frontera entre Aruba y Venezuela ta cera desde februari di e aña aki despues cu Venezuela unilateralmente a cera e frontera. Na mei Venezuela kier a habri e frontera pero Gobierno di Aruba a dicidi e ora pa cer’e.

Gobierno a prolonga e ciere aki na juni y september y e tabata valido te 10 di december. Gobierno di Aruba awor a dicidi di prolonga e ciere aki cu 3 luna mas.

Gobierno a haya peticion di ciudadanonan cu kier bay bishita famia na Venezuela of cu kier bay dokter na Venezuela. Tambe Gobierno a wordo acerca pa importadornan di fruta pa importa fruta y berdura di Venezuela. Y finalmente Gobierno a wordo acerca pa Hulanda cu tin problema cu e ciere di frontera pasobra nos no ta den guera cu Venezuela. Gobierno ta compronde tur e motibonan y peticionnan aki y nos a considera nan tur, pero na e momento aki habri e frontera cu Venezuela no ta den interes general di pais Aruba.

“Nos ta convivi cu e situacion na Venezuela. Nos tin conocir, famia, amistadnan aya y aki cu ta sufri hopi bou e circumstancianan aki. Aruba ta haciendo su parti.

Como hende, como mama, y wela, mi por sigura bo cu e decision aki ta duro, pasobra mare nos por a yuda mas, mare nos por a haci mas, pero nos no por. E problemanan di Venezuela mester wordo resolve den Venezuela mes. Aruba no por soluciona nan. Nos mester tene cuenta cu Aruba awor.

Mi ta spera di por conta cu comprension di comunidad di Aruba pa cu e decision aki.

Y mientras tanto mi ta pidi pa nos tene e pueblo di Venezuela den oracion y ohala cu pronto e situacion por resolve”, Prome Minister Evelyn Wever-Croes a expresa


Share This
error: Content is protected !!