KRALENDIJK – Awe djamars 3 di desèmber 2019 ‘Bonaire Travel’ a selebrá 20 aniversario. Relashoná ku nan selebrashon, tabatin un mainta spesial. Empleadonan di ‘Bonaire Travel’ i gerente a invitá prensa pa inisiá nan selebrashon. A hasi entrega di un chèk ku balor di 2000 dòler na Fundashon Kunuku Kakelvers, un instansia ku ta atendé ku animal. Promé ku a hasi entrega di e chèk a dirigí palabra Natasja Statie-Gerharts, doño di e negoshi. El a menshoná ku nan tabatin tempu bon i ménos bon, sinembargo nan a hasi tur posibel pa sobrebibí i kontinuá. Despues a papia Valeska Gustowski:” Nos tin nos klientenan ku ta kere den nos i nan ta gusta e forma ku nos ta yuda i guia nan. Nos ta hasi e trabou ku plaser na bienestar di e kliente. No ta tur dia ta fásil, sinembargo nos ta traha fuerte pa duna e bon servisio. Tin bon desaroyo ekonómiko riba e isla i nos ta kontinuá. Mi ta gradisí pueblo di Boneiru. Pa boso nos ta kontinuá. Nos di ‘Bonaire Travel’ ta gradisí komunidat, pasobra sin boso nos lo no a yega 20 aña, Gustowski a menshoná. Seguidamente a papia Franchesca Statie kende ta e empleado ku tin ménos tempu ta laborá. “Tur mainta mi ta yega i yama bondia na kolega i klientenan ku hopi alegria. Tur dia ku mes un animo pa traha den e tim di ‘Bonaire Travel’. Mi stima e trabou i huntu nos ta brinda e bon servisio na e kliente, entre otro el a menshoná. Último persona ku a dirigí palabra tabata Marienella Fecunda. Awe el a kumpli 20 aña na e kompania, pues e tabata presente for di prinsipio. E ta atendé e parti krusero loke e ta hasi ku hopi amor el a konta. Despues a kontinuá ku kòrtamentu di bolo i un momentu di selebrashon.

Kombinashon di potrèt ta ilustrá entre otro Peter Kerssemakers di ‘Fundashon Kunuku Kakelvers’ kende a risibí un chèk komo regalo. Lema di ‘Bonaire Travel’ ta: ‘Your Window to the World’.

Share This
error: Content is protected !!