KRALENDIJK – Djamars anochi a tuma lugá un aktividat “Anual Award Night” organisá pa MCB. Tres organisashon a bin na remarke i tabata presente e anochi pa risibí nan premio. Fundashon FORMA, Bon Karate i Rosa di Sharon. Durante e anochi Leonard Domacasse, direktor di Maduro & Curiel’s Bank Bonaire (MCB) a dirigí palabra na tur presente. Entre otro el a menshoná e plan ku tin pa futuro di MCB. “Hopi aña nos ta organisá e aktividat aki fin di aña i ta skohe algun organisashon ku mas a destaká. Pa medio di votamentu di nos koleganan di banko, ta eligí e grupo ku ta bai na promé lugá. Tur aña ta difísil pa skohe i ta lista largu di organisashon tin. Meta di e donashon ta pa stimulá e organisashonnan pa kontinuá ku e bon trabou,” e direktor a menshoná. Despues a papia Marie Craane di Fundashon FORMA, Desiree Silberie di Bon Karate i Tamara Richards di Rosa di Sharon. Tur a konta kiko nan organisashon ta hasi i a yama danki na MCB pa a skohe nan pa risibí e premio. Seguidamente a kontinuá ku e momentu pa skohe, kua ta esun ku ta sali na promé lugá, di dos i tres lugá. Rosa di Sharon a resultá e ganadó na promé lugá.     

Share This
error: Content is protected !!