KRALENDIJK – E hóben artista Boneriano Irwin Sluis mihó konosí komo Ir-Sais tabatin sigur un aña inolvidabel i eksitoso mirando ku su kansion ”Dreamgirl” a bira un kansion hopi gustá i a bira viral varios parti di mundu. E kansion ”Dreamgirl” a marka pouta na Hulanda i Antias. E piesa aki a bira hopi konosi despues ku a start un ‘Dreamchallenge’ na Fransia i asina a sigui plama rònt oropa i Merka. E ‘Dreamchallenge’ aki ta un baile hopi apart ku a laga hopi hende konosé e kansion aki. 2017 na momentu ku e kansion aki a wòrdu publiká riba e plataforma di youtube, despues di dos aña tin un total di kasi 24 Mion views, sin konta e miones di ‘streams’ nan ku e kansion aki a kue riba plataformanan online di musika manera Spotify, Deezer I Apple Music.

E aña aki mes un ‘label’ hopi grandi di musika na mundu ku ta karga e nòmber “Sony Music” a aserká Ir-sais i tabata hopi interesá den e kansion “Dreamgirl”. Despues di negosashon ‘Sony’ a kumpra “publishing rights” di e kansion aki.

Nos a bin tuma nota di algun proyekto grandi ku Ir-sais ta bezig kune. Ta trata di un proyekto unda Ir-sais a kolaborá ku un artista Latino Urbano basta konosi di Puerto Rico ku ta hiba di nòmber “Rauw Alejandro”. E dos artista nan aki a kolaborá pa trese e kantika ‘Dreamgirl REMIX’ ku ta wòrdu lansá djabièrnè próksimo huntu ku su videoclip ku a wòrdu grabá na Kòrsou pa e konosido Ryan “QD” Navarro.

Esaki sigur ta un notisia hopi positivo ku nos ke a komparti ku nos siguidornan. Esaki ta pone ku outomatikamente nos lenga Papiamentu un biaha mas ta wòrdu promové rònt mundu via e kansion aki.

E tim di Radio Live99 ta manda un pabien pa Ir-sais i Boneiru kompletu pa e logro positivo aki i alabes un logro hopi grandi pa Ir-sais mes.

Share This
error: Content is protected !!