Miembronan di Fundashon “Nos Kier Boneiru Bek”, Oradornan e invitadonan spesial, ,,,,,,,,,,

Pueblo di Boneiru aki presente i tambe esnan na kas ku ta sigi e enkuentro aki via e diferente medionan di komunikashon, bonnochi.

Un kordial saludo ku aliento di sostén for di Korsou, di parti di miembresia di nos Partido Pueblo Soberano.

Partido “Pueblo Soberano” ta un partido ku ta kere den prosesonan di emansipashon i soberania ku finalmente mester resulta den independensia di Korsou.

Informashon i edukashon di e pueblo ta e faktor kritiko di éxito mas importante, pa logra pensamentu emansipatorio i soberano.

Bo no por bira soberano a base di e tradishonal submishon “Ja Meneer, Nee Meneer” i pensando ku Mundu ta kuminsa i kaba na Hulanda.

Meskos ku na inglés ta hasi distinshon entre “Liberty” and “Freedom”, na Papiamentu nos por bisa ku ora bo “tin libertat” ta otro for di ora abo ta “liber”. Libertat ta algu externo i e ta nifika ku nos ta liber pa skohe basta ku nos skohe denter di loke ser presenta o permiti na nos.

Ser liber en kambio ta algu interno i ku ta nifika ku nos mes tin e posibilidat pa den forma digno disidi nos mes destino.

Kolonialismo a ser reemplasa pa un sistema nobo di dominashon konosi komo neoliberalismo.

Den Neoliberalismo apart for di e politika exterior dominante di algun paisnan desaroya, denter di e paisnan aki bo ta topa ku e berdadero podernan grandi ku ta tras di kortina, i ku ta dikta e agenda mundial. Ta trata di e korporashonan grandi, e multinashonalnan o trans-nashonalnan.

Hulanda no ta exepshon den esaki. E berdadero agenda pa nos islanan den Reino Hulandes ta ser dikta dor di korporashonannan grandi na Hulanda i Merka, manera por ehempel SHELL, UNILEVER, i ING.

Na Korsou nos a konose e rebellion di katibunan na aña 1795, i na 1863 a aboli esklabitut, pero na mes momentu a introdusi otro formanan di kolonisashon di nos pueblonan.

Es mas; E supuesto autonomia ku nos a haña na 1953 tabata resultado di e hecho ku doñonan di kapital a haña un forma pa somete poder politiko na nan. Prome ku autonomia e poder politiko tabata den man di poder kapital i ta nan mes tabata goberna. E poder di kapital a bira dje fuerte ei ku nan por a hala atras i goberna for di tras di kortina. Pues gran parti di e poder politiko ta ser dirigi dor di e poder di kapital.

Hopi ta esnan na mundu ku a kere den kapitalismo. Hopi ta esnan ku a kere ku e tarea di e ser humano ta pa duna un balor agrega na e mundu di kapital.

Fresku den nos memoria ta kon e sistema kapitalista i su spekulashon finansiero a kondusi na e gran crisis finansiero i Bankario ku a kuminsa na Merka na 2007 i ku a afekta hinter mundu den un tempu rekord. Tabata un berguensa pa esnan ku ta defende kapitalismo.

Pero mas bergonsoso ainda, ta e hecho ku a husa fondonan públiko sea den forma direkto o indirekto, es desir fondonan di pueblo pa rekupera e bankonan i sistema kapitalista.

Durante di e añanan 86 – 89 Antias a konose e Minister pa asuntunan Antiano i di Aruba, Jan de Koning.

Pa e dominio di nos islanan Hulanda e tempu ei a aplika un maneho politiko di DIVIDI i REINA.

E tempu ei nos a konose un Mundu Bipolar ku tabata transformando den un Mundu Unipolar ku e kaida di Union Sovietika i e Muraya di Berlin.

Sin embargo despues di apenas tres dekada e Mundu Unipolar a transforma su mes den un Mundu Multi Polar ku e regreso di Russia komo potensia Mundial i surgimentu di e gigante Asiatiko China.

E proseso aki a kana kompañá ku surgimentu di diferente blokenan ekonomiko.

Djis pa nombra algun di nan importante pa e region di Caribe i Latino Amerika, nos tin: CARICOM (Komunidat Karibense); Asosiashon di Estadonan di Caribe (AEC-ACS, Gran Caribe), CELAC (Comunidad de Estados Latino-Americanos y del Caribe), MERCOSUR (Mercado Comun del Sur), UNASUR (Union de Naciones Suramericanas) etc.

Mirando e sed expansionista di Hulanda, ku semper a biba di su politika exterior, i e sed di dominio i husa nos islanan komo trampolín pa Latino Amerika i Caribe, nan a kambia e politika di dividi i reina.

Nan a bini ta purba di trese nos bek huntu bou di un kapa, pero esaki no a logra. E esfuersonan pa esei di e Minister pa Asuntunan di Reino, Ernst Hirsh Ballin a frakasa. E divisionismo entre e islanan tabata muchu avansa. Nos a siña bringa ku otro, mientras algun di nos tabata alaba Mama Hulanda.

Ku tempu nos a bin ripara ku Hulanda su úniko interes ta pa domina e islanan na fabor di su interes ekonomiko I politiko, sin permiti desaroyonan den e islanan ku finalmente por hasi Hulanda su presensia obsoleto i bisele “TE AWERO”.

Wel awor nan ta purba gara nos un pa un.

Nos por a tuma nota di esei mediante e proseso di rekolonisashon moderno ku Hulanda a bini ta aplika na e islanan. Esaki a kuminsa na St. Maarten, sigí pa St. Eustatius, Boneiru i awor Korsou.

Hulanda a torpedia e projekto di siglo ku lo a pone Korsou komo potensia ekonomiko riba mapa mundial. Esaki ta e projekto ku nos a kumbini ku e empresa Chines GZE pa modernisa e refineria, integra e planta di CRU den e refineria, Amplia e kapasidat di almasenahe di krudo I produktonan petrolero na Bullenbaai,  konstrukshon di un planta di Gas Likido Natural na Bullenbaai, Konstrukshon di un terminal di Gas Likido Natural pa Barkunan Krusero na Bullenbaai, Konstrukshon di un Planta di Elektrisidat ku lo a produsi un surplus di korriente ku por a sirbi komo backup pa otro islanan den Caribe i establese un zona di agrikultura moderno den e area entre Bullenbaai I e barionan den bisendario.

Tur esakinan Hulanda I Merka a torpedia hasiendo uso di e aktual gobiernu di nos ku ta un gobiernu entregashonista na hulanda, un gobiernu bomba, kruel, mentiroso, e intransparente ku sistematikamente ta gobernando ku “LOMBA PA PUEBLO”.

En bes di permiti un desaroyo digno pa habitantenan di Korsou ta hasi tur posibel pa sera e refineria, sea den forma inmediata o den forma diferi dor di sera deal ku un partner swak i di reputashon dudoso. 

Mediante e tal jamá “Groeistrategie” ku ta nada otro di un forma modernisa di e “Opleg Notitie (Nota di Imposishon – Hirsh Ballin)” ke domina tur e areanan gubernamental importante pa asina, habri kaminda pa empresanan Hulandés apodera di nos Haf I otro terenonan strategiko, Invershonnan Hulandes Asfixiante, i husa nos komo trampolin pa Amerika Latino I Caribe.

Damas I Kabajeronan, pueblo soberano ta di pleno konvikshon ku a pesar di tur esaki Hulanda I e Korporatokrasia di nan, finalmente lo no logra stroba e proseso di emansipashon, autodeterminashon, soberania, i finalmente Independensia di Korsou.

Nan lo no logra debi na e siguiente motibunan:

  1. E bala asesino ku lokual a purba silensia nos lider politiko emeritus, Helmin Magno Wiels, solamente a logra multiplika Helmien den hopi di nos ront Korsou;
  2. E kolonisadonan a komete e error di siña nos lesa I skirbi, i asina nos mes por forma nos propio konsenshi mediante akumulashon di konosimentu;
  3. E sistemanan ku e mundu globalisador a bende ront mundu ta pone ku un suseso ku tuma luga ta plama ront mundu den algun minuut o hasta sekonde;
  4. Pueblonan ront mundu ta lentando den forma progresivo kontra dominio, diskriminashon I exploitashon di hende, i ta exigiendo kambionan konstitushonal pa garantisa mas poder popular, kambionan di e aktual modelo ekonomiko asfixiante i rechazo na kolonisashon dor di seng;
  5. Tin un otro mundu nasiente kaminda pueblonan ta hañando oportunidatnan alternativo; Oportunidatnan ku pa permiti desaroyo humano den forma digno, ganashi na tur dor banda (win-win), mediante un aserkamentu di hende pa hende; disidi ku ta i finalmente,
  6. E sentido di rebellion di Tula ta bibu bibu den nos kompatriotanan di hinter Caribe i manera e revolushon di 30 di Mei na Korsou, tempran of lat e lo manifesta su mes si sigi ninga nos derechinan.

Damas i Kabajeronan, danki pa boso atenshon.


Share This
error: Content is protected !!