Mensahe di Atvènt 2019 

Rumannan den Kristu, nos ta drenta un aña litúrgiko nobo i e temporada di Atvènt ta ofresé nos fiestanan spesial pa legra nos kurason di grandi i chikí. Mi ta invitá boso pa prepará ku fe i deboshon e Nasementu di Hesus nos Salbador, kompañá pa su Mama Maria, su Inmakulada Konsepshon, patrono di nos Diósesis. 

E temporada di Atvènt ta un oportunidat pa nos selebrá i biba nos fe siguiendo e tema ku papa Francisco a proponé pa e luna di Òktober i ku nos, komo Diósesis, ke sigui profundisá durante henter e aña pastoral 2020: Batisá i mandá den mishon pa henter mundu. Kon nos por biba nos boutismo i nos mishon durante e temporada di Atvènt i Pasku di Nasementu? Mi ta proponé kuater aspekto (òf manera) ku Atvènt ta ofresé nos pa medio di e Palabra di Dios, e signonan di Liturgia i e deboshon popular: Atvènt ta tempu di vigilansia, di kombershon, di speransa i di alegria

Atvènt ta tempu di vigilansia 

Hesus ta spièrta nos bisando “sea alerta, pasobra boso no sa ki ora e doño di kas ta yega” (Mk 13,35-36). Esaki no ta pa spanta nos, ma pa spièrta nos konsenshi, pa Sali for di un aktitut egoista, habri nos kurason i nos bista na e nesesidat di nos rumannan i na e urgensia di renobá nos bida i nos mundu. E vigilansia ku Hesus ta indiká tambe ta pa nos hasi preguntanan serio riba e sentido di nos bida, riba nos vokashon riba e manera kon nos ta hasi uso di loke Dios ta duna nos. Un otro aktitut di vigilansia kristian ta pa medio di orashon: manera Hesus ta bisa den otro lugá di Evangelio: “Para firme i lanta kabes pasobra boso liberashon ta serka”(Lk 21,28). Ta indiká aki pa elevá nos pensamentu i kurason na Hesus ku ta bini. Ora nos ta warda algu òf algun persona, nos ta keda alerta i lantá. Nos ta warda Hesus i ta p’esei nos ke keda lantá i den orashon (Papa Francisco, Orashon di Angelus 2-12-2018). 

Atvènt ta tempu di kombershon 

E yamada na kombershon ta resoná den e bos di Huan Boutista: “Bira lomba pa piká pasobra reino di shelu ta serka” (Mt 3,2). E ta rekordá e mensahe di profeta Isaias: “Habri kaminda den desierto pa Señor… yena tur vaye i baha kada seru i seritu…e lugá yená ku piedra i baranka mester bira un lugá lizu (Is 40,3-4). Nos ta yamá pa yena e bashí ku indiferensia i mal karakter ta produsí, i habri nos mes na otro ku e mesun sintimentu i aktitut di Hesus: laga nos praktiká kordialidat, atenshon i sirbishi pa aliviá e nesesidatnan di nos próhimo. Ta nifiká tambe yena e bashí ku falta di amor i di karidat ta produsí, ku ta manera un kaminda yen di buraku. Nos tin ku baha e seru i seritunan, esaki ta referí na e opstákulonan ku orguyo i soberbia ta produsí. Hopi hende, sin paga tinu, ta kousa sufrimentu na otro pa nan falta di kordialidat i bon trato. Laga nos superá esaki pa medio di gestonan konkreto di rekonsiliashon, i si ta nesesario, pidi pordon pa e faltanan aki. No ta fásil rekonsiliá ku otro, pero Señor ta yuda nos si nos tin kurason abrí. Kombershon kompleto ta ora nos rekonosé ku humildat nos erornan. 

Atvènt ta tempu di speransa 

Atvènt ta pa ekselensia tempu di speransa, un speransa ku no ta defroudá pasobra ta basá riba e Palabra di Dios, i e promesa di Señor ku semper ta fiel. (papa Francisco). Durante e simannan ku ta separá nos for di Pasku di Nasementu, e kaminda di speransa ta keda iluminá pa Hesus. Nos ta profundisá den e deseo ku Hesus por realisá den nos e salbashon ku El a kumpli kaba, pero ku Liturgia ta hasi nos selebr’é awe den e Palabra di Dios i Santa Eukaristia. Tin hopi hende ku a pèrdè speransa i ta kana sin un orientashon, sin ningun seguridat riba futuro. Hopi di nos rumannan ku a batisá i ta profesá fe kristian tambe ta biba e realidat aki. Ta reina miedu pa futuro i pa tuma desishonnan pa bida largu. Na e rais di e pèrdida di speransa aki nos ta haña e aktitut skondí di ekskluí Dios for di nos bida! Pero si falta Dios, speransa ta disparsé tambe i tur kos ta pèrdè sentido (papa Benedikto XVI). Hende no por biba sin speransa. Dios ku konosé kurason di hende, sa ku esun ku ta rechasé ta pasobra no a konosé su kara berdadero. Ta p’esei Dios no ta stòp di yama na nos porta, manera un peregrino ku ta buska hospedá den nos kas. Den Atvènt Señor ta konsedé un temporada nobo na humanidat pa yega na un enkuentro personal kuné. Atvènt ta yuda nos bolbe nos mirada i kurason na Dios; e ta rekordá nos ku mester ta kla pa un enkuentro ku Dios den tur momento di nos bida. 

Atvènt ta tempu di alegria 

E alegria ta aparesé den hopi lektura di profeta Isaias for di prinsipio di Atvènt: “T’esaki ta e Señor di nos konfiansa. Awor nos por kanta yen di alegria, pasobra El a trese salbashon pa nos (Is 25,9). E di tres Djadumingu di Atvènt a tuma e nòmber di Djadumingu “Gaudete” (legra boso) pa motibu ku ya Nasementu di Hesus ta serka i Liturgia di Santa Eukaristia ta habri ku e palabranan aki di San Pablo: “Keda semper kontentu den Señor! Mi ta ripití: keda kontentu, Señor ta serka” (Fil 4,4-5). Papa Benedikto XVI tabata bisa ku “esnan ku ta akohé e donnan di Dios na un manera egoista, no ta haña e alegria berdadero, miéntras ku esun ku ta hasi uso di e donnan pa stima Dios ku gratitut sinsero i ta transmití su amor na otro, e tin e kurason yen di amor”… “Tempu di Atvènt ta un tempu no solamente di kombershon, sino tambe di goso, pasobra den kurason di tur kreyente ta lanta e speransa di binimentu di e Salbador, i ora bo ta spera e yegada di un persona ku bo ta stima, ta semper un motibu di alegria”. “Di ki sorto di alegria nos ta papia? Un alegria di un kurason agradesido, alegria di un kurason ku ta rekonosé e amor di Dios; alegria ku ta deskubrí e signonan di bondat di Dios”. 

Rumannan, mi ta invitá boso pa drenta e temporada aki di Atvènt ku kurason kontentu, pasobra Nasementu di Hesus semper ta motibu di speransa i alegria. Mi ta animá famia, skol i parokianan pa rebibá tambe e bunita tradishon di Pesebre ku ta un skol di bida, ora nos mira la Bírgen i San Hose, ku apesar ku nan no tabatin hopi kos pa disfrutá i ofresé na e Niño Hesus, nan tabata yen di alegria pasobra nan tabata stima otro i sirbi e Yu di Dios. 

Boso sirbidó den Hesus i Maria, 

+ Luis A. Secco, SDB Obispu di Willemstad 


DESEONAN PA DIANAN DI FIESTA DES. 2019- AÑA 2020


Pa medio di esaki pader Santiago, vikario di Bonieru, kier a ekstendé su profundo deseonan di pas, bendishon kombershon, reflekshon i alegria  durante e dianan benidero sperando selebrashon di Pasku di Nasementu di nos Señor Hesus Kristu. Kende a bini na mundu pa nos salbashon. Pader Santiago ta deseá pueblo di Boneiru un felis Pasku ku yen di alegria, dicha i ku mira konstante, den kompania ku ser kerínan, den direkshon di Kristu Hesus. Pader Saniago ta pidi Dios Todo Poderoso danki pa tur e bendishonnan ku Boneiru a risibí durante 2019 i pa Dios sigui drama su bendishon, grasia, pordon i miserikordia riba nos pueblo di Boneiru, pa den e aña benidero nos por sigui kumpli ku Su santa boluntat. Un felis aña 2020 pueblo di Boneiru!

Boso sirbidó, 

Pader Santiago Malagon Pedraza,Vikario Episkopal di Boneiru


Share This
error: Content is protected !!