ANUNSIO DI PROGRAMA PA DESAROYO DI FUTBOL BONERIANO

Komo parti di e plan stratégiko di 2018 pa 2022 FFB  ta bai kuminsá den 2020 ku e programa di desaroyo di futbòl den koperashon ku KNVB i un ofisina ku ta duna konseho tokante di deporte ku ta NMC Bright. 

FFB su vishon ta pa invertí i desaroyá nos hubentut i ku  esei lo hiba nos na mihó prestashon di e isla i e lo duna nos siudadanonan un pashon pa bida largu pa futbòl. Den esaki e programa aki lo bai duna un kontribushon. 

E programa  ta konsistí di mas aña kaminda FFB ta bai invertí den desaroyo di nos klupnan i tambe treinen pa trainer, koach, rèfri, dirigentenan di klupnan etc. E programa di desaroyo di futbòl aki lo mester kontribuí na un desaroyo duradero pa futbòl riba nos isla.  FFB ta bai hasi un invershon den trein i guia boluntarionan di e klupnan, manera direktivanan i coachnan asina ku tin mas konosementu i eksperensia disponibel pa desaroyo di futbòl. 

Dor di sostené e klupnan, asina ku nan por organisá nan mes, aún mas mihó, e programa aki lo kontribuí pa nos mantené un klima seif i sigur pa deporte. FFB ta  sostené i apoyá e klupnan pa krea un kultura di deporte positivo i pa mehora nos estudionan pa hubentut, esaki lo hiba nos na mihó hungadónan hubenil. Pa desaroyo di e mucha ta esensial pa nan deskubrí nan talentonan i pa stimulá nan den esaki. futbòl ta duna e posibilidat pa duna hubentut perspektiva pa un mihó futuro. E ta duna un kontribushon na nan outo-estima i e ta desaroyá nan kompetensianan, manera traha huntu, i pa nan ta mas mihó prepará. 

Pa por ehekutá e programa di desaroyo di futbòl Boneriano, FFB ta habri un vakatura pa un empleado pa e programa aki. Despues ku  nombra e empleado aki lo bini sekshonnan di informashon pa tur stakeholder, i prinsipalmente e klupnan pa asina por duna mas informashon tokante di e programa aki. 

Share This
error: Content is protected !!