BALUARTE EZZARD ÈZI SEMELEER

Ezzard Franklin Florentino Semeleer a nase na Boneiru den bario di Nort’i Saliña, riba 14 di mart 1951 komo yu di Narciso ‘Piet’ Semeleer i Maria Semeleer-Thomas. Despues di a kaba skol Èzi a kuminsá su formashon komo ‘banketbakker’ na e panaderia di sr. Gerharts. Den su formashon di karera di profeshon el a bai Hulanda tambe pa durante un periodo e sigui formashon teorétiko i práktiko.
Èzi ta kasá ku EnidSemeleer-Winklaar i e pareha tin 2 yu hòmber ku a duna nan 2 ñetu muhé.
Èzi ta konosí komo un persona independiente, strukturá i eksakto den su aktonan i tambe komo un persona ku ta traha efikas i ku perseveransia.

Banda di su trabou komo panadero i trahadó di bolo Èzi ta hopi konosí riba tereno di deporte, semper el a stima futbòl i biar. Komo hóben pa diferente aña el militá den e ekipo di SV Estrellas i despues tambe komo presidente di Estrellas. Su kurason den e último dékadanan ta bati pa biar. For di 1985 te 1991 huntu ku doño di Paito Snack nan a organisá weganan di biar na Nort’i Saliña. Meta prinsipal tabata hasi e deporte, ku tabata un deporte praktiká prinsipalmente den bar, popular na Boneiru i den nos bario. Èzi tabata organisá torneo tantu pa hóben komo adulto anto den un torneo a yega di partisipá 65 persona.
Na 1987 el a konsentrá riba lantamentu di diferente tim den bario i esaki a produsí 5 klup pa kompetí kontra otro: Tamarijn Grande, JohnBlokkenfabriek, Arowak, HermanosMelaan i BT Azteca. Nan tabata konsistí di alrededor di 30 miembro. Pues basta hende tabata praktiká biar den bario ku torneonan na PaitoSnack. Pa e torneonan tabata invitá muchanan di otro bario tambe. BT Azteca te awe ta eksistí i a kumpli 32 aña di eksistensia i ta partisipá na diferente kampeonato di biar bola 8 di Boneiru. Èzi ainda ta aktivo den biar. Poko poko e idea a krese pa lanta un organisashon ku ta enkargá ku e deporte i Èzi a hiba kombersashon ku diferente persona. Riba 15 di mart 1991 a lanta e federashon di biar boneriano FeBiBo, ku 7 ekipo afiliá. Di 1992 te ku 2000 Èzi a fungi komo presidente di e federashon siguí despues di 2004 te 2010. Aktualmente e ta konsehero.

Pashon di Èzi ta serka nos hubentut i su kas semper ta disponibel pa trein e deporte riba e mesa ku tin na su kas. Su meta ta pa kita e hóbennan for di kaya i praktiká e deporte di biar. Na 1998 el a bai Kòrsou ku un grupo di 12 hóben pa partisipá na weganan aya i nan a regresá kas ku tur premio. Èzi ta organisá kampeonato hubenil i e biardistanan ku yega den tòp ta haña oportunidat pa bai representá Boneiru na weganan panamerikano i si nan sali ganadó nan por mundial di biar tambe. E desaroyo den biar a kondusí na realisashon di un sala di biar na 2004 den kompleho deportivo Jorge Nicolaas, kaminda hende muhé tambe konfortablemente por praktiká e deporte i públiko grandi por presensiá.

Na aña 2001 a honra Èzi na Aruba komo un di baluartenan antiano, na aña 2013 a dediká e kampionato boneriano na su persona. Su trabounan boluntario tin un trayektoria di mas ku 30 aña i e ta aktivo ketu bai riba e tereno akí. Pero últimamente el kuminsá ta konsentrá mas riba su klup i riba hóbennan.

Tur loke Èzi a duna na hóbennan i na komunidat a bira e motibu pa Fundashon Nawati duna Ezzard Franklin Florentino Semeleer un plaka di mérito komo Baluarte di bario di Nort’i Saliña.

Share This
error: Content is protected !!