Ta pa di 2 biaha den e 10 añanan di selebrashon di Dia di Nort’i Saliña ku fundashon Nawati ta haña su obligá di duna mérito póstumo na un persona komo baluarte di Nort’i Saliña pa motibu ku den bida morto tin biaha ta kana un kaminda misterioso den bida ku ta laga plannan di hende bibu kai den huma.

E promé biaha tabata na aña 2014 ku nos baluarte Aquiles “Kili” Vis ku a pasa pa e otro mundu i e aña akí ku sr. Narciso “Siso” Nicolaas a bai laga nos riba 31 di yüli 2019, promé ku nos por a proklam’é komo baluarte di bario.

NarcisoJacithoMacarioNicolaas a nase dia 2 di yanüari 1949 na Aruba komo e di 3 yu di Daniel i TeclaNicolaas-Muller. Komo yu di mayornan boneriano kende a bai Aruba pa buska trabou, Siso a pasa gran parti di su hubentut den San Nicolas na Aruba. Ku edat di 15 aña su mayornan a regresá Boneiru definitivamente pa bin biba den Kaya Caribe 25 den nos bario.
Na Boneiru Siso a kaba su Mulo i a haña un beka pa bai sigui studia ‘GemeenteAdministratie’ na Hulanda. Despues di a finalisá su estudio ku éksito, Siso ta regresá Boneiru na 1970 i ta bai traha komo Hefe di e Servisio di Landsfinanciëndi Antia na Boneiru. Den su karera laboral el a traha tambe un temporada na e departamento di DEZA. Na aña 2009 Siso a baha ku penshon pero a sigui riba ‘lowprofile’ ta yuda otro ku formulashon di karta ku sierto petishon na gobièrnu i konseho den su área di karera i asuntu sosial.

Na 1972 Siso a kasa ku sra Patricia Mejia, for di e matrimonio akí a nase 3 yu hòmber ku a duna Siso 4 ñetu hòmber i un ñetu muhé.
Siso ta konosí komo un gran amante di músika. Hopi di nos por rekordá Siso komo integrante di e promé grupo di aguinaldo di nos bario, “Los PajaritoNavideños” i tambe komo integrante di e banda popular “The Thunderbirds”. Deporte tambe a marka un liña kòrá den su bida, den su oranan liber e tabata praktiká karate i taekwondo. Hopi hende konosé Siso komo instruktor di arte martiali komo lider di e tim hubenil di beisbòl “Malta Amstel”. Siso tabata un di e promé alumnonan boneriano di buseo i a haña lès serka Don Steward.
Mas aleu riba tereno sosial por mira tras riba Siso su karera komo miembro di direktiva di e.o. Boneriaanse Judo Bond, Boneriaanse Sport Federatie, Banko di Desaroyo, Reclassering, Studiefinanciering en Huisvesting i Union di Penshonadonan (UPAH). Ademas Siso a aparesé riba lista di un partido polítiko pa elekshon. Segun edat a subi Siso salú tabata eksigí hopi atenshon di Siso, te ku despues di un periodo basta largu di malesa Siso a bai laga nos lamentablemente na edat di 70 aña.

Direktiva di Nawati ke pidi akí un minüt di silensio na memoria di Siso i tambe di tur e otro yunan di bario ku a bai laga nos den 2019.

Un anékdota ku algun miembro di direktiva di Nawati ta kòrda: preparando pa un di e selebrashon di Dia di Nort’i Saliña e aktual presidente di Nawati huntu ku otro miembro a topa Siso riba kaya i a para outo pa duna pabien ku dia di bario. Su reakshon ku bista riba e presidente el a komentá: “Pero abo no ta mucha di bario. Abo ta di Mentor, na rant di Nort’i Saliña!” Ku harimentu nan a kontinuá nan rumbo.

Pa tur loke Siso a duna bèk na komunidat ta motibu pa Fundashon Nawati duna sr. Narciso Jacintho Macario Nicolaasun plaka di mérito komo Baluarte di bario di Nort’i Saliña.

Share This
error: Content is protected !!