Lionel  Pietersz un Boneriano legítimo de pura sepa ya pa hopi aña establesé na Hulanda. Durante dianan di Regata 2019 Lionel konosí pa Layo, tabata na Boneiru i a keda algun siman. E tabatin fakansi di trabou sinembargo tarea na kas a kontinuá. El a hasi diferente kos na Boneiru durante e dia nan, entre otro kambia dak di kas di su mama. El a menshoná ku Boneiru ta e lugá ku mas e stima i ta sintié na kas. E ta biba leu pa motibu di kompromiso, sinembargo sèmper Boneiru ta den su kurason. “Ami a nase na Boneiru bai skol i despues momentu mi tabatin 24 aña mi a bai biba Hulanda. Awor ya ta 21 aña na establesé na Hulanda.  Na 1998 mi a tuma desishon pa bai Hulanda pa mi yunan unda nan por a haña mihó guia e tempu aya. Na Boneiru mi tabata traha pa e kompania ‘De Antillen N.V.’, ku tabata drecha entre otro kareteranan i ami a traha den e parti di ‘krusher’. Mi último trabou na Boneiru tabata  kaminda e kompania a traha e área pa praktiká tènis na kas di famia de Jongh,”Layo a konta

HULANDA

“Mi a yega Hulanda pa duna e yunan un bon oportunidat pa nan edukashon. E tempu aya Boneiru no tabata bai den bon direkshon i tabata e motibu ku mi a opta pa bai Hulanda.  Situashon ekonómiko no tabata di kanta makamba. E yunan a bai bon na skol i esun mas chikitu a kaba skol i ya ta traha. Pues mi a logra e meta i ta hopi orguyoso di mi mes. Ami a hasi diferente kurso entre otro kon pa  atendé ku mashin, forklift i e parti di seguridat pa atendé ku trabou di e mashin nan. Mi promé trabou na Hulanda tabata manehá ‘Heftruk’. Famia tei i mester traha pa por ta responsabel pa nan. Momentu mi a yega Hulanda mi a pidi ‘uitkering’, sinembargo nunka mi a risibí e pago. Semper mi a traha p’ami sèn i no stens pa gobièrnu kria famia i ami. 21 aña trahando na Hulanda i tur kos ta kana stabil den mi trabou loke mi tin bon konosementu pe. Manera ya mi a menshoná mi a kuminsá ku ‘Heftruk’ i a bira ‘voorman’, despues a presentá un oportunidat pa ‘all aront magazijn mede werker’. E departamentu ku mi tabata laborá aden tabata bai sera, pues mi mester a buska algu otro pa kontinuá. E otro trabou mi a ehersé e trabou komo asistènt shef. Despues di algun aña mi mes a tuma e desishon pa stòp di traha na e kompania.

2006 mi a bai laborá na ‘Van Vliet Watering‘

2006 mi a bai traha na ‘Van Vliet watering recycling bedrijf’ i tabata manehá un ‘Soteer kraan’. Aki mi a traha di solamente 2 luna. Momentu mi a tuma nota di un otro kompania  di un oportunidat  pa un trabou na ‘MNO Vervat’, mi a bai traha aya , ku tabata un ofisina mas serka di kaminda mi ta biba. Na MNO Vervat  mi a bai atendé ku loader, te ku 2011. Despues nos a pasa pa ‘Boskales’ debí ku ‘MNO Vervat’ a bira ‘Boskales’. E mashin ku mi ta manehá ta un loader 938M. E kompania ta hasi diferente tipo di trabou. Drecha kaminda, drecha dijk, mantené infrastruktura, túnel djis pa menshoná algun. Ku regularidat ta eksihí pa sigui kurso i treinen pa bo ta ‘Up to date’,”Layo a konta.

Kaya nan na Boneiru

 Den kombersashon ku Layo el a konta ku na Boneiru nan ta atendé straño ku drechamentu di kaminda. Layo:”Na Boneiru mi a tuma nota ku ta atendé straño ku drechamentu di kaminda.  Ta saka e parti di fundeshi i yena esaki ku tera nobo promé ku pone asfalt, kontrali loke ta hasi na Hulanda i diferente otro parti di mundu si por bisa asina. Loke nos ta hasi na Hulanda ta kita djis algun centimeter for di e asfalt eksistente i pone un kapa di asfalt nobo. Ken ami ta pa bisa kon mester ehersé e trabou pa e ta mihó.  simplemente na mi pareser e saka mentu di tera, esta e fundeshi, ta pone ku e trabou ta mas hopi dia , mas sèn i por hasi otro ku mes òf mihó resultado.

Boneiru ta den bon desaroyo.      

Boneiru ta den bon desaroyo. Ta notabel último añanan, sigur for di 10. 10 .10  pa awor, tin adelanto. Turismo  a mehorá, hopi kas kompará ku pasado i hopi hende ta interesá den un kas na Boneiru pa kumpra òf traha pa bin biba na Boneiru. Por lo pronto ami ta keda Hulanda. Hulanda ta bon sigur pa e próksimo añanan. Boneiru ta paraiso. No tin hopi regla manera ta e kaso na Hulanda. Esnan biba na Boneiru mester apresiá apesar ku nos ta parti di Hulanda  nos ta nos ta poko aliviá di tur medida ku na Hulanda si te eksistí. Kisas tin kos pa drecha loke ta e kaso tur parti di mundu, sinembargo aki ta dushi:”Layo a tèrminá bisando.  Bon kambio di aña pa tur hende.   


Share This
error: Content is protected !!