Fin di aña ta e temporada di mas dushi di aña. Nos grandinan tabata bini huntu pa kompartí tur nan dushi rekuerdonan, pero prome ku risibí bishita e preparashonnan nesesario di kustumber tabata tuma luga. Tabata prepara mesa, warda bishita i hasi kas limpi ku sensia den espera di e aña nobo. Awendia esakinan a bira tradishonnan ku no por hasi falta. 

Djasabra awor 28 di dezèmber lo bai tin e ultimo edishon di e evento kultural ‘Nos Zjilea’ pa e aña 2019 na Mangazina di Rei. E biaha aki ku e tema “Tradishonnan di Fin di Aña”. Kustumber pa fin di aña ta pa prepara diferente kos dushi. Sr. Constantino “Tino” Thielman lo duna un demonstrashon kon pa prepara un dushi piska den zür pa sera aña kune.

Na tur fin di aña tin kantamentu na barí den kual nos por tende tin tiramentu di palabra pa otro. Durante di ‘Nos Zjilea’ bo por bin tende diferente kantikanan di bari. 

Pa yama un aña nobo bon bini no mester limpia kas so i pasa basora ku mòp pero tambe hasi e preparashon spiritual pa asina tur kos ku ta bon por yega. Sra. Letycia “Letty” Beaumont lo komparti kiko tur tin ku tene kuenta kune ora bo ta sensia bo kas. 

Ku fin di aña dilanti di porta mester kuminsa prepara pa e aña nobo. E tradishon pa habri aña nobo kune aki na Boneiru ta e selebrashon di Maskarada. Bin gosa di un dushi Maskarada huntu ku e grupo di Maskarada.

Tambe por hasi uso di e oportunidat pa bishitá e bunita eksposishon tokante di e rikesa kultural di e bario Rincon. Tur esaki den un dushi ambiente parti di mainta ku Ka’i Òrgel sigui despues ku presentashon “Live” di Grupo Ritmiko “Timon Krioyo” ku kantikanan di bari i nan eksitonan del momento. Dimes e pareha di baile Donny i Monique Winklaar lo tei pa deleita nos ku nan bailenan folkloriko. 

Marshe Krioyo no por keda afo ku su produktonan fresku i lokal manera ku pueblo a kustumbrá kune. Lo bai tin entre otro djus natural, chukulati di pinda, pan ku ham di pasku, arte lokal i hopi mas. Kushina ta habri for di 10’or di mainta ku platonan sukulento manera kabritu stoba, galiña stoba, kabes ku higra i pa keinta stoma lo tin un bon sòpi di mondongo masha dushi mes. 

Ban brasa, selebrá i kompartí nos dushi kultura na ‘Nos Zjilea’ djasabra awor 28 di dezèmber di 8 ‘or di mainta te ku 2 ‘or di mèrdia na Mangazina di Rei. Pa un programa mas detayá por bishitá e Facebook Fanpage di Mangazina di Rei.   

 — Fin di komunikado —

Share This
error: Content is protected !!