KRALENDIJK – E kompania ku ta maneha algun instituto pa gobièrnu di Boneiru ta bai disparsé. Prome ku final di 2020 mester desmantelá Bonaire Holding Maatschappij. Tin un estudio ku a wòrdu hasi pa e kompania ‘CRM Link’ ku ta rekomendá pa laga tur kompania di gobièrnu operá riba nan mes.

A lanta BHM den pasado pa manehá kompanianan di gobièrnu, manera WEB, BIA, TELBO, BONLAB i algun mas. E tempu ku a lanta BHM e tabata un bon idea, pero rapòrtnan ta indiká ku den e tempu di awor ta mihó pa laga kada kompania, ku nan hunta di komisario i gerensia, manehá nan mes.

Gobièrnu di Boneiru a pone tres persona ku mester bai traha pa desmantelá BHM. Ta trata di Giovanni Hart, Burney El Hage i Ben Oleana. Di nan tres, Oleana ta esun ku entre otro lo tin ku bai traha pa yena tur e vakaturanan ku tin den e kompanianan di gobièrnu. Ta bai usa kriterionan estrikto, pa haña den e komisiariadonan hende ku konosé e materia i espasio pa hóbennan drenta i pa asina krea lidernan nobo. Pues no nombramentu polítiko manera den pasado.

Ben Oleana ta direktor di Fundashon Cas Boneirano (FCB). E ta sigui den e funshon ei, pero 20 ora pa siman ta traha pa BHM.

Share This
error: Content is protected !!