KRALENDIJK – Gobièrnu di Boneiru tin plan pa bai krea un área kultural grandi riba e tereno na unda e anterior prisòn di Boneiru (JICN) tabata ubiká den sentro di suidat. Durante e último simannan a basha e kompleho abou, despues ku aña pasá a okupá e kompleho nobo den e anterior plantashi Aruba.

E plannan pa e área ku a bini liber aki ta den fase inisial di diskushon. Funshonarionan di R&O resientemente a tene un presentashon pa gobièrnu. E idea básiko ta pa krea un área kultural, na unda por tene enkuentronan kultural, presentashonnan grandi.

Turismo krusero tambe ta bai haña espasio den e área durante dia.

Tur esaki ta idea di ámtenarnan. Na final ta gobièrnu mester tuma desishon. Por a komprondé ku gobièrnu su pensamentunan ta bai mas aleu ainda den e área aki, entre otro konektando e espasio grandi di stashoná outo banda di stadion riba e área kultural. Ta pensando pa krea lokalnan ku por sirbi komo mediateka, biblioteka i otro fasilidatnan den e direkshon aki.

No mester eksluí e posiblidat, ku gobièrnu lo por bai drenta kombersashon ku doñonan di kas den kaya Hermandad pa mira si por yega na kompra di e kasnan aki pa desaroyá e área.

Share This
error: Content is protected !!