WILLEMSTAD – Añanan anterior nos por a mira ku selebrashon di Fuikdag a bai hopi na òrdu i bishitantenan por a gosa di aktividat bon i sigur. Pa por sigui logra ku tur asuntu ta kana di forma organisá durante selebrashon di Fuikdag, ku por lo general ta wòrdu selebrá e promé djadumingu di Aña Nobo, outoridatnan kompetente, manera Polis, Warda Kosta, Inspekshon Marítimo, Kapitan di Haf, Servisio di Bombero, Douane, Servisio di Ambulans, Krus Kora, CITRO i representantenan di Santa Barbara Plantation, despues di a reuní ku Ministerio di Hustisia, kier a komunika lo siguiente.

Konforme tur anja di nobo, mirando ku e evento aki a alkansa un embragadura di tal magnitut ku e riesgonan mará na dje tambe a oumentá di forma konsiderabel, ku mester tene kuenta ku algun medidanan.

Algun di e medidanan tumá ta enserá entre otro ku:

A.) No ta duna pèrmit pa benta di alkohol;

B.) No ta duna pèrmit pa músika publiko riba vlὸt of pódium;

C.) Personanan ku a paga pa baha boto na pir di Caracasbaai, so lo por hasi uso di e “slipway”.

D.) Tur boto ku ta partisipá na e evento, aparte di nan dokumentonan, mester tin sufisiente vèst di salbabida abordo (konforme kantidat di pasahero abordo), además artefaktonan apropiá di señal, flùit etsetera; Lo tin kòntròl riba tur e rekistonan aki di boto dor di Haven en Veiligheid Inspectie i Warda Kosta.

E.) Ademas Servisio di Bombero ta efektúa kontrὸl pa loke ta sendementu di kandela abordo pa preparashon di Bar-B-Que;

F.) Despues di 5’or di atardi no ta permití pa sigui toka muzik;

G.) No ta permití pa despues di aktividat na Fuikdag pa bai mara na e pir di Santa Barbara Plantation.

Ta bon pa tene na kuenta ku e asuntu di hiba i trese hende tambe no ta keda permití mas; ku otro palabra hende ku tin nan propio boto so por yega Fuikbaai. E medida aki a bira nesesario, pasombra tur anja ta resulta ku hendenan ku tuma ‘kabe’i boto’ (left) ta keda pegá na Fuikbaai sin por yega Caracasbaai; konsekuentemente nan ta purba kana via tereno privá di Barbara Beach pa yega siudat. Tur esaki unikamente ta kontribuí na mas kaos i komo tal no ta keda tolera mas.

Lo bai tin kontrol di imigrashon riba botonan ku por tin ekstranhero na bordo. Tur Boto ku ta bin di otro pais di afó i bin bishita Kòrsou ta obliga di pasa imigrashon i Douane pa “klaar in”.

Ta bon pa un i tur tuma bon nota di e reglanan aki, pasombra outoridatnan ta bai aktuá ku man firme pa garantisá ku tin orden i seguridat durante selebrashon di Fuikdag.

Ministerio di Hustisia di Kòrsou

Share This
error: Content is protected !!