KRALENDIJK – Gobièrnu di Boneiru tin e intenshon pa oumentá e impuesto ku ta kobra turistanan krusero. Boneiru ta kobra un ‘headtax’ manera ta yama e impuesto aki, ku ta hopi mas abou ku loke ta kobra na e otro destinashonnan den region. Intenshon ta pa entrante mei 2020 hisa e ‘headtax’ di 2 dòler pa $3.50, ku opshon pa despues gradualmente yega na un montante di 8 dòler.

Boneiru den pasado, pa atraé kompanianan di barku di turista, a introdusí un tarifa di ‘headtax’ hopi abou kompará ku otro destinashonnan den Karibe. Awor tin e espasio pa hisa e ‘headtax’ ku ta kobra na Boneiru na nivel di otro isla i paisnan den region. Te awor no tin indikashon ku oumento di e ‘headtax’ lo bai afektá turismo krusero. Djis tene na kuenta ku otro destinashonnan ta kobrando ‘headtax’ hopi mas haltu ku Boneiru.

E plaka adishonal ku e impuesto aki bai produsí lo bai pa drecha e produkto turístiko pa e sektor di turismo. Proyekshon pa aña 2020 ta pa Boneiru risibi 465.866 turista krusero.

Share This
error: Content is protected !!