KRALENDIJK —  Rosandy  Ortega  un dams di 22 aña  trahadó di bolo special. Rosandy ta un Boneriano, sinembargo el a nase na Kòrsou pa motibu médiko i denter di algun dia el a bin Boneiru. E ta yu di pareha Luis i Karti. E tata ta venesolano i e mama yu di Kòrsou, sinembargo ámbos tin hopi aña na Boneiru, sigur mas ku 22. Trahamentu di bolo ta un hòbi di Rosandy miéntras e ta laborá na ofisina di impuesto. El a konta ku e wela Teresita Augusta tabata traha bolo i e yu Karti a siña for di e mama.

 “Mi wela Teresita tabata trahadó di bolo i mi mama a siña serka e mama i e inspirashon a yega serka ami pa medio di mi mama. Mi a krese mir’é traha bolo na kas i tabatin e deseo pa traha bolo. Komo tiner mi a puntr’é i el a pèrmití pa guiami. Di e forma aki mi a kuminsá poulatinamente traha bolo di manteka i improvisá na kas. Durante tempu mi mama tabata dunami tarea pa traha bolo pa konosí nan. For di chikitu mi tabata gusta traha obra di man. Esei a motivámi pa traha bolo dòrna ku ‘fondant’.  Mi por traha diferente tipo di bolo loke ta deseá i riba pedida di un persona. Hopi bia  e hende ta pidi i manda loke nan ta deseá i ami tin ku pèrkurá pa  traha loke ta nan deseo. No tin malchi pa traha bolo ku diseño. Tur kos mester bin for di bo abilidat i konosementu. E ta rekerí práktika. Mi ta kapta e kos rápido. Mi ta mira algu i den un tempu kòrtiku mi ta trahe. Mi tata ta hopi  entusiasmá i ta motivámi hopi. Semper su reakshon ta impreshoná di loke mi traha. E ta dunami mas kurashi pa kontinuá

Mi ta traha bolo pa kasamentu, boutismo, Pasku, fiesta di mucha i mas. For di chikitu mi tabata bisami mama mi deseo ta pa bira kòki. Kushinamentu ta mi pashon. Na Boneiru no tabatin e posibilidat e tempu aña pa siña kushina, siguiendo esaki na un nivel di estudio haltu.  Asina mi a bai MBO ‘bedrijfsatministrateur’ ,i kushinamentu a keda den mi mente i ken sa den futuro e por bira algu mas amplio di loke mi ta hasi ta awor.  Loke mas mi a gusta di e arte òf e bolo ku mas a impreshonámi ta difísil p’ami skohe pa awor. Internet ta  yuda hopi i mi gusta mas eksperimentá den kushina mi mes kreatividat. Resientemente mi a traha un bolo ku hariña di solamente koko i el a resultá bon. Mi plan i deseo ta pa yega na propio empresa. Mi ta yòn i ta orientá kiko por hasi den futuro, sinembargo e deseo tei pa e área di horeka.  Aparte di ami, mi ruman Roshendra Adelina –Ortegata tambe ta traha bolo ku hopi fantasia. Ami ta poko mas buyà kuné, e mas trankilo, sinembargo  nos tur dos tin e talento di oma i mama pa loke ta trata trahamentu di bolo,”Rosandy a konta.     

 Mi a yega di duna lès na muchanan

Den pasado mi a duna lès  na algun mucha. Mi tabata pensa e tempu aya miéntras mi tabata bai skol i durante  fakansi mi no tabatin nada pa bai hasi. Mi ruman i ami a yega na e idea pa bai duna lès pa siña traha diferente kos. Tabata mi idea i mi ruman a tuma den pa nos hasié. Nos a duna un kurso di traha kos dushi pa muchanan.

Nos a kumpra material i a hasié. E muchanan tabata bini i nan tabata siña traha 5 kos riba un dia,

ku tabata konsistí di ‘Cheesecake’ , bolo, kesio, ‘piña colada’ i ko’i lechi.

Mi a haña vários mayor ta puntrando ku interes pa un dia  bolbe organis’é. A kumpli ku nan petishon pa organisá un bes mas e biaha aki den fakansi di Pasku di resurekshon. E kurso tabatin un durashon di 3 dia, kaminda e muchanan a siña 12 diferente reseta.

Despues mayornan tabata ke pa mi a organisá pa nan siña i mi a hasi 2 wikènt spesial pa mayor, unu kaminda nan a siña traha pasapalu i e otro kon traha kos dushi,”Rosandy a konta.

Share This
error: Content is protected !!