KRALENDIJK – Djabièrnè mèrdia Maduro & Curiel’s Bank Bonaire N.V. (MCB), manera ta nan kustumber, a manda Lito, e leonsito amigu di tur mucha, personalmente hospital San Fransisco pa bishitá i sera konosi ku e promé beibi di 2020. MCB tur aña di nobo ta malkriá e promé beibi ku regalo. Lily- Ann Domacassé di MCB huntu ku Lito tabata presente i Lily-Ann a dirigí algun palabra na e okashon. “Pabien ku e beibi, e promé di 2020. Apénas e yu a mira lus di dia i ya e ta asina famoso, yen di hende serka dje pa dun’é atenshon. Hopi bendishon pe i dun’é e kariño i atenshon ku e mester pa e ta un bon yu pa e famia,” entre otro Domacassé a menshoná na e okashon. Interesante ta, ku Samantha Domacassé, mama di e beibi Jay-Dionne Rombley, ku a nase 2 di yanüari algun minüt pasa di 7 di anochi, tambe ta promé beibi di aña. El a nase na 1992 komo promé beibi di aña, i 2020 komo mama di e promé beibi di aña. Tata di Jay-Dionne ta Fabrizio Rombley. Peso di e beibi ta 3630gram. Un ambiente tabatin den e kamber kaminda e famia tabata ku e beibi.

Pòtrèt ta ilustrá momentu ku MCB i Lito a entregá e famia un regalo huntu ku un buki di spar.  

Share This
error: Content is protected !!