KRALENDIJK – Te ku un próksimo aviso, e ofisina di seguro di kuido, Zorgverzekeringskantoor BES (ZVK), no ta manda niun pashènt di Boneiru pa tratamentu médiko na Dr. Horacio Oduber Hospital na Aruba. A tuma e desishon aki relashoná ku e atake sibernétiko, ku a afektá hòspital di Aruba. Segun ZVK, luna pasá e hòspital di Aruba, Dr. Horacio Oduber Hospital a bira víktima di un atake sibernétiko. Piratanan di kòmpiuter ‘Hackers’ a drenta e sistema digitalisá di e hòspital i a paralisá esaki por kompletu. Esaki tabatin komo konsekuensia ku komunikashon interno di e hòspital a bira imposibel. Te asta mester a hasi un apelashon riba direktor di Fundashon Mariadal, Dr. Giovanni Frans, ku ta miembro di e tim di kalamidat di Dr. Horacio Oduber Hospital, pa duna asistensia. Komo ku Dr. Frans ta konsiderá ku tin muchu riesgo pa manda pashèntnan di Boneiru pa Aruba pa tratamentu médiko, el a duna konseho na ZVK pa para tur traslado médiko te ku un otro aviso. Banda di esaki, Dr. Horacio Oduber Hospital, pa motibu di e situashon ku a surgi, a disidí di limitá su mes na solamente atendé kasonan di emergensia. Esaki a kousa un lista largu di espera di pashènt di Aruba mes. Pesei a opta pa no tuma pashèntnan djafó.

Radio Live 99.9 FM por a komprondé ku pa motibu di e mudansa resien, hòspital nobo di Kòrsou, ‘Curacao Medical Center’ (CMC), tampoko no ta tuma pashènt djafó.

Share This
error: Content is protected !!