KRALENDIJK – Algun outomóbilista ta remarká ”kon ta posibel ku ta pèrmití pa e tipo di vehíkulonan manera tin riba potrèt kore riba nos kayanan legalmente”. Segun e hendenan, e vehíkulo no ta apropiá pa kore riba kaminda públiko. Nada kontra esnan ku ta manehá e vehíkulo, sinembargo nan a kumpra òf traha e kos i siguré na un kompania di seguro, kumpra number meskos ku tur otro vehíkulo i nan ta legal riba kaya. E pregunta ta, ken ta pèrmití òf kontrolá e vehíkulonan i a pèrmitínan pa kore riba kaya? Segun ekspertonan den e materia, pa bo sigurá un vehíkulo e mester tin lusnan di indikashon, lus di dilanti, lus di patras pa señal di brek i pa anochi. Sinembargo e vehíkulonan aki no tin’e. Kua ta e kompania di seguro ku a bai di akuerdo pa sigurá e vehíkulonan aki ta otro pregunta. Algun luna pasá un kantidat di regla i diskushon pa kontrolá garoshi pa kore na bahada di seru di Karpata. Gobièrnu a pone regla estrikto ku mester kontrolá tur, sinó no ta posibel organisá e aktividat ku ta den un área será kaminda no tin tráfiko. Bèrdat ta importante i na su lugá, pa kontrolá i asina evitá ku algu ta bai inkorekto ku tur e konsekuensianan. E pregunta di esnan ku ta remarká tokante e vehíkulonan plat di 3 wil ku ta legalmente supuestamente riba kaya, ken a kontrolá nan? Si ta kontrolá garoshi ku ta bai kore den un área reservá ku tur tipo di regla, ken a pèrmití pa laga e vehíkulonan aki kore riba kaya? Kaminda mester kontrolá, a laga tur kos pasa bai, òf esnan ku a kontrolá no tin konosementu di e materia. E vehíkulo di 3 wil riba potrèt ta spesífikamente pa “drift” i “fever”. E vehíkulo tin 1 wil grandi dilanti i 2 wil chikí patras. Kualke mucha por rekonosé esaki. Polis, gobièrnu i esnan ku ta kùr vehíkulo, no por a rekonosé esaki? Aparte ku nan no ta apropiá pa kore riba kaya, nan ta algu peligroso debí na e forma ku nan ta, esta hopi plat. Kisas shofùr di e vehikulonan plat aki no ta para ketu na e peliger ku nan ta hinka nan mes aden, pero bida di otro tambe. ”Nos ku ta outomóbilista pará pa sali na un punta di hanchi no ta mira e vehíkulo plat aki si e ta patras di kualke outo, i pakolmo ta ‘spin’ ku esaki riba kaya”, ta entre otro loke algun persona a remarká i a pidi pa Radio Live99 duna atenshon na esaki. Radio Live 99.9 FM a papia ku polis di tráfiko i a bisa ku tin atenshon pa e situashon.

Share This
error: Content is protected !!