KRALENDIJK – Radio Live 99.9 FM a papia ku Frensel Janga di direktorado di inspekshon i mantenshon di lei. E kombersashon tabata relashoná ku e problema di tiramentu di sushi na sitio prohibí. Janga: ”Bèrdat e situashon di tiramentu di sushi a bolbe lanta kabes manera ta bisa. Siman pasá nos tabata pabou di e área di Plantashi Aruba, un sitio ku tabata hopi sushi i a limpia e sitio limpi limpi aña pasá. Sinembargo a bolbe tira sushi na e sitio. Ta di lamentá ku nos hendenan ta deshasí di sushi riba tereno prohibí. Tin mas sitio ku e hendenan ta tira shushi riba e isla, entre otro material di konstrukshon i sushi di kas. Di nos parti nos ta trata pa kore i kontrolá diferente área, sinembargo e hendenan ku ta deshasí di sushi ilegal ta tira sushi den mondi despues di e momentu ku ta kontrolá, atardi lat i anochi. Mester sinta huntu ku e gruponan ku ta kontrolá pa asina forma un tim mas amplio pa frena e situashon mas mihó posibel. Ta difísil pa stòp e asuntu di tira shushi den mondi kompletamente, sinembargo si logra stòp un gran parti di esnan ku ta kometé e akto, lo ta hopi bon. No ta fásil pa topa un hende tirando shushi den mondi, i si esei ta e kaso, sigur ta tuma medida serio kontra e persona,” Janga a menshoná. El a finalisá bisando: ”Nos ta bai hasi tur esfuerso pa kontrolá i evitá ku hende ta tira sushi den mondi. Nos ta pidi pa habitantenan no sigui tira shushi den mondi. Si topa un persona ta hasiendo esaki, e ta responsabel pa e konsekuensia, ”Janga a terminá bisando.

Share This
error: Content is protected !!