KRALENDIJK – Un desaster ta loke por konsiderá e loke esnan ku mentenan anti-deportivo, anti-futbòl, a hasi un biaha mas na Fèlt Elio Flores e dianan di fiesta tras di lomba.

Ta kada bes ta kousa daño na e fèlt di bala aki, por sièrto un fèlt di bala ku hopi, tantu mucha, adulto i veterano ta hasi uso di dje.

Un suidadano, por sierto un futbolista veterano atento ku hopi atenshon pa e fèlt aki, un biaha mas mester a konstatá e desaster ku a kousa na e fèlt aki.

E siudadano aki ta bisa ku e aña aki si Fèlt Elio Flores mester haña e atenshon ku e meresé, ya ku esaki ta bai ku pasonan grandi atras.

Pilá di porta di kurá a kuminsá plama foí otro i mester di atenshon.  

E bòrchi ku nòmber dje fèlt i potrèt di e futbolista Elio Flores ku a representá Boneiru e tempunan aya Antia na masha hopi okashon, a bai kasi kompletu.

Nètnan di palunan di gol ta tur kibrá.

Hèkwèrk o sea e kurá a basha bou.

Pa kolmo den fin di aña a haña bon di tira vürwèrk tambe riba e fèlt aki.

Kiko tin ku e fèlt o kontra e fèlt aki ku kada bes ta kousa daño na esaki?

Probabel kurá di blòki

Ku tur probabilidat, e kurá di waya di Fèlt Elio Flores, lo bira di blòki i no mas di waya.

Manera ta konosí, atrobe e kurá di waya di Fèlt Elio Flores a kai òf a tumba esaki.

Informashonnan ku nos tin ta mustra ku ta papiando, pa mui probabel lanta e kurá di blòki.

E muraya di blòki ta menos kostoso i tin durashon pa sèmper por bisa, si kompará esaki ku e kurá di waya.

E kurá di waya ta bunita pero e durashon no ta largu i ta kostoso si kada bes tin ku keda lanta esaki di nobo.

Tin ku kambia e waya i pipanan ku ta karga e waya dje kurá, loke tampoko no ta duradero si kompará esaki ku muraya di blòki.

Por a mira kaba kon a lanta a fèns di Jossy Boekhoudt Ballpark di blòki, ta lantando tambe e fèns di leftfield di Don Julio Angela Ballpark na blòki, loke tambe tabata di waya pero ku a putri kai.

Por a komprondé ku ta sondea kiko lo por ta e gastunan pa lanta sigur e kurá di Fèlt Elio Flores ku últimamente a kai, di blòki.

No tin diskushon ku muraya di blòki lo ta mas kumbiniente ku waya i pipanan di heru o sea staka di heru ku ta karga e waya di kurá.

Echo ta ku e tipo di trabounan aki ta dura, ya ku tin ku buska ofèrta pa mira kua ta mas kumbiniente, mester tin sèn pa hasi e trabou.

Awendia tambe, ta pidi sèn na man pa kuminsá hasi e trabou pa no hasi e trabou i  entregá trabou i ta tarda pa haña pago.

Nos ta spera ku pronto lo keda kla ku tur esakinan pa drecha e lokenan ku tin keda drechá na e fèltnan di deporte di nos isla.

Por ehèmpel ta pendiente pa keda kla ku e fèns di blòki na Don Julio Angela Ballpark pa kuminsá ku sea torneo pa kalentá promé i despues kampionato.

Tambe ta imporante pa hasi yamada un biaha mas na esnan ku kada bes ta hasi daño na fasilidatnan di deporte, pa stòp ku esaki.

Tur esakinan kada bes ta kosta gobièrnu kantidat di plaka ku por a invertí den mas falisilidat di deporte pa nos isla.

Laga nos ban kuida enbes di destruí.

Share This
error: Content is protected !!