KRALENDIJK – Diputado James Kroon den entrevista ku Aimed Ayubi na Radio Live 99.9 FM, a menshoná ku 2019 tabata un aña positivo i ta spera ku 2020 ta mihó. “E konsepto manera tabata ántes kon ta kampaña pa voto a kambia den partido polítiko, “Union Patriótiko Boneriano”. Tin hopi otro manera pa kampaña i konvensé e hende vota pa partido. Nos tres diputado, Nina den Heyer, Elvis Tjin Asjoe i ami ta den bon harmonia i nos tin un meta pa goberná serio pa un mihó Boneiru. Nos no ta papia di 2 partido sino un partido ta goberná e isla di Boneiru. 2019 tabata preparashon i awor den 2020 ta momentu pa ehekutá kos. Entre otro ta bai drecha e área banda di e algun skol i mas. Ta bai asfaltá  kaya Amsterdam práktikamente kompletu. E kaya pega ku Jachthaven ta den proseso pa wak kuantu ta bai kosta pa drech’é e situashon, kaminda laman ta subi tera. E fondonan ya tei. Tin plan pa drecha e kaya ku ta karga e nòmber Broetje Janga, si ta bai asfalté. Nos ta atendiendo loke a sosodé na Velt Johan Cruyff pa yega na un forma pa drecha e vèlt, despues ku a hasi algun kambio. Meskos ta bai atendé ku diferente otro tereno ku ta praktiká deporte, entre na Stadion di Playa. E parti di iluminashon na diferente sitio ta rekerí atenshon i ta trahando riba esaki. Pa awor e área di prison bieu ta keda lugá pa stashoná outo i tin kombersashon i pensamentunan pa kombertié den algu otro,” entre otro diputado Kroon a menshoná.  

 

Share This
error: Content is protected !!