SERVISIO METEOROLÓGIKO LO SIGUI VIGILÁ E AKTIVIDAT SÍSMIKO DEN ÁREA DI LAMAN KARIBE, ESPESIALMENTE ESNAN SÙIT DI PUERTO RICO

WILLEMSTAD – Ayera mardugá a registrá un temblor fuerte na Puerto Rico ku tambe a wòrdu sinti na algun parti di Kòrsou. E temblor aki a sosodé 4:24 A.M. i tabatin un magnitut di 6.4 riba Eskala di Richter, na un profundidat di 10 kilometer i su episentro tabata serka di kosta sùit di Puerto Rico. Basá riba e datonan aki, no tabatin menasa di tsunami. Sin embargo, a wòrdu menshoná sí ku tabatin un chèns hopi chikitu pa un tsunami lokal. Servisio Meteorológiko Kòrsou, ku ta risibí e informashon i ku ta monitoreá e fenómenonan di naturalesa aki 24 ora pa dia, pa e motibu aki no a emití un alerta pa tsunami. Por indiká ku e temblor aki ta parti di un gran kantidat di temblor. For di fin di desèmber 2019, despues ku a registrá un seri di temblor den e área aki, Servisio Meteorológiko a kuminsá paga mas atenshon na e área aki. Si resultá di ta nesesario, Meteo lo emití alerta inmediatamente.

Pa por emití alerta basá riba datonan asina, Meteo na 2010 a hasi un estudio di e riesgo pa un posibel tsunami ku por impaktá Kòrsou. Pa e estudio aki a usa ku lo bai tin un temblor di magnitut di 8.0 den e área menshoná. Pa por kalkulá e riesgo, a hasi uso di informashon pa kalkulá kuantu e daño lo ta na

1. daño na hende i komunidat,
2. daño material i ekonómiko
3. daño na medio ambiente.

For di e estudio aki a sali ku mas o ménos 5.5% di poblashon ta biba den un region ku lo ser inundá. E daño material i ekonómiko lo ta grandi, ya ku aktividat ekonómiko importante, por ehèmpel komèrsio, turismo i servisionan finansiero ta tuma lugá den e regionnan di inundashon. Den kaso di medio ambiente espesialmente áreanan di naturalesa na kosta, manera refnan di koral, playa i saliñanan lo sufri hopi daño.

Servisio Meteorológiko ta kolaborá ku e grupo intergubernamental di region pa tur e aspektonan aki di tsunami den nos region, kaminda e ofisina di alerta pa tsunami merikano ta kalkulá e riesgonan, usando kòmpiuternan avansá i ta asesorá e servisionan den Karibe. Pa por monitoreá e eventonan aki, Meteo mes tambe tin sistemanan di kòmpiuter pa monitoreá temblornan i tambe un stashon pa midi posibel tsunami. Por apuntá aki ku Kòrsou tabatin e honor di ta anfitrion pa e reunion di e komishon di tsunami na aprel 2018.

Pues Meteo ta bon ekipá pa por monitoreá i si ta nesesario emití alerta relashoná ku posibel temblor I tsunami.

Manera semper, Meteo lo sigui hasi su trabou na tur momento (24/7) pa brinda protekshon na nos komunidat.

Pa risibí alerta inmediatamente, por manda un petishon pa risibí boletinnan di alerta na nos number di telefon +5999 5601089 di WhatsApp òf download nos app Curacao Weather.

Pa mas informashon, por akudí na e vínkulo aki (https://www.meteo.cw/Data_www/pdf/pub/TSU%20_final.pdf) ku ta duna akseso na e promé parti di e rapòrt (na hulandes) di e komishon di tsunami, miéntras ku e otro vínkulo aki (https://www.meteo.cw/Data_www/pdf/pub/RA%20_final.pdf) ta duna akseso na e di dos parti. Den e di dos parti aki por mira un mapa ku ta indiká e áreanan mas vulnerabel pa inundashon.

Share This
error: Content is protected !!