KRALENDIJK – E konosido komersiante Vita Frans bon konosí pa tante òf tanchi Vita a fayesé. Tante Vita no mester di masha introdukshon. Un persona konosí, amabel i semper servisial ku hopi amor. Asina e ta ku tur hende tur momentu di dia. Sea den pakus ‘Boutique Vita’ òf riba kaya, asina tanchi Vita ta. Sin kita e parti ku si algu no ta kanando bon na su pareser, ku e lo bisabo esaki flèt.

2015 tabatin un aktividat na Plasa Francisco ‘Chiku’ Goeloe na Antriol. E aktividat tabata organisá pa hendenan di ‘Pasadia Villa Antonia’, kendenan a selebrá sena di Pasku na e sitio ariba menshona. Debí ku e kas di ‘Pasadia Villa Antonia’ tabata den restourashon, a skohe un otro sitio pa organisá e aktividat. Durante e aktividat, Juliana Angela a dirigí palabra na tur presente. Entre otro el a menshoná ku miembro nan di ‘Pasadilla Villa Antonia’ ta manda palabranan di gradisimentu spesialmente pa Tanchi Vita i esposo Jaime. “Semper nos ta keda kòrda e gesto grandi ku Tanchi Vita a hasi, esta di duna kas di su tanta defuntu Antonia na nos. Pa e motibu aki e kas ta karga e nòmber di ‘Pasadia Villa Antonia’, ”Juliana a menshoná.

Hopi por kòrda Tante Vita den e programa di ranchera na Radio Voz di Boneiru, momentu ku e tabata yama i huntu ku Feliciano Piloto nan tabata kombersá di diferente tópiko. Sigur hopi skuchá i gustá e tempu aya. Asina Vita a bai. Dios dun’é un lugá den su reino i yena e bashí ku a keda serka su esposo i famianan. Radio Live 99.9 FM ta deseá hopi forsa na famianan den e momentu nan difísil.  

Share This
error: Content is protected !!