KRALENDIJK – Djaweps atardi alrededor di 5’or un aksidente di tráfiko entre 2 vehíkulo a tuma lugá den e bario di Hato na altura di e krusada Kaya Eindhoven i Kaya Den Haag. E aksidente aki a sosodé pa falta di dunamentu di preferensia. Despues di e impakto, un di e vehíkulonan a kore bai dal den un palu di lus i pa despues basha un kurá di kas abou. Loke a hala atenshon tabata un transformator grandi ku tabatin na e palu di lus ku milagrosamente no a bin abou i kai riba e vehíkulo. Pa motibu di e aksidente aki, bario di Hato kompletu tabata sin koriente for di den oranan di atardi te ku den oranan di mardugá di awe djabièrnè. Tur 2 vehíkulo envolví tabata tin hopi daño material. Shofùr di un di e vehíkulonan tabata keha di doló i pèrsonal di ambulans a presentá na e sitio pa un chekeo médiko. Habitantenan di e bario di Hato a bisa Radio Live99.9FM ku esaki ta e di tantisimo biaha ku tin aksidente ta sosodé na e krusadanan den e bario. Polis i CRS tabata na e sitio pa atendé ku e aksidente, mientras pèrsonal di WEB tabata rápido na e sitio pa repará e daño kousá na e palu di koriente.

Share This
error: Content is protected !!