KRALENDIJK – Partido Demokrat a manda un karta pa representante di Reino interino, Jan Helmond, den kua e partido ta eksigí pa destruí e desishon tumá pa Kolegio Ehekutivo pa laga e kompania di awa i elektrisidat, WEB NV, fia e montante di 64 mion dòler di un konsorsio i finansiadónan. E partido lo bai papia serio tambe ku minister Raymond Knops durante su bishita e siman aki na Boneiru. Partido Demokrat ta desaprobá e desishon aki kaminda ta laga un identidat propiedat di Entidat Públiko Boneiru, fia un montante haltu asina, sin konsultá ku Konseho Insular. E konsorsio ta formá dor di fondo di penshon Vidanova, MCB Boneiru i MCB Kòrsou.

Dia 2 di janüari Konseho Insular a risibí un karta di Kolegio Ehekutivo ku e tema ‘Desaroyonan na WEB’, ku fecha 20 di desèmber 2019. Esaki Miembronan di Konseho Insular pa Partido Demokrat, Clark Abraham, Michael Pieters i Rolanda Hellburg-Makaai, a skirbi den un karta pa representante di Reino interino. Kolegio Ehekutivo den e karta pa Konseho Insular ta informá ku WEB a aserká un konsorsio i institushon finansiero pa un fiansa di 64 mion dòler pa invertí den suministrashon di koriente riba nos isla. Tin indikashon ku e konsorsio ta dispuesto pa kumpli ku e petishon di fiansa, pero ta stipulá komo parti di e kondishonnan di e akuerdo, kaminda algun kondishon tin relashon ku e akshonista di WEB, den e kaso aki Entidat Públiko Boneiru, kaminda sierto kuadro i limitashon ta keda poné a base di e kompetensia komo akshonista.

Partido Demokrat: ”Manera ta konosí Konseho Insular tin un funshon komo kontroladó di Entidat Públiko Boneiru. E funshon aki ta eksplísitamente ankrá tantu den lei i regulashon nashonal komo lokal. Asina tin den lei ku Kolegio Ehekutivo i su miembronan ta obligá di duna tur informashon na Konseho Insular. Banda di esaki ta eksplísitamente poné ku Kolegio Ehekutivo mester informá Konseho Insular si ta trata di asuntunan di derecho privá”. Mas aleu Partido Demokrat ta hasi pregunta tokante volúmen di e fiansa i ku e fiansa no por ta mas haltu ku un parti i mei di e presupuesto di Entidat Públiko Boneiru. Banda di esei e partido ta mustra su prekupashon tokante loke ta e volúmen di e fiansa ku lo nifika pa mantené awa i elektrisidat pagabel riba e isla.

Share This
error: Content is protected !!