KRALENDIJK – Djabièrnè último Flamingo TV a saka e ganadó di e kampaña 2019, kaminda un persona por a gana un outo marka Nissan Kicks 2020. Durante e anochi a saka 4 premio i esun mas grandi tabata e outo.

E anochi a saka tur bòn for di den un kaha i depositá nan den tómbola. Un kantidat enorme di bòn. Tur esaki a sosodé den presensia di notario Andre Gosselaar di ofisina di notaris Kenneth Arends. Despues a drai e tómbola, loke tabata hopi pisá. Promé ganadó tabata Rodney Winklaar kende a gana 1 aña di cable grátis. Di 2 persona tabata Bernadita Janga ku a gana 1 aña di internèt grátis. Hugo Samper a gana 1 aña di internèt i cable grátis. Despues a toka turno pa saka e bòn di e pèrsona ku ta bai gana e outo. Damian Garcia kende ta 15 aña kliente di Flamingo TV a resultá ganadó di e Nissan Kicks 2020.  
Aimed Ayubi kende tabata guia e aktividat, a tuma kontakto ku Damian pa bis’é loke a sosodé.

Momentu ku Aimed a kuminsá papia ku Damian, el a kontesta telefon i menshoná ku e ta bañando. Aimed a bis’é dal un baño di ‘Cowboy’ i yega rápido pa e start su outo nobo. No a dura hopi, ku Damian i famia a presentá na Flamingo TV, sin ku e tabata sa kolo di e outo. El a bisti un kamisa i sapatu kòrá. E i su esposa tabata hopi kontentu i emoshoná. Patrick Dowling, direktor di Flamingo TV a entregá e yabi i Damian a start e outo nobo ku awor ta di dje. Patrick Dowling a finalisá bisando ku ta bai kontinuá ku e kampaña di 2020, pa un hende por gana un outo nobo atrobe fin di aña.
A klousurá e aktividat ku un tremendo show di vürwèrk.

Share This
error: Content is protected !!