KRALENDIJK – Di parti di USIBO i tur sindikatonan afiliá nos kier manda nos mas sinsero deseonan di prosperidat i bienestar pa henter e famia grandi di Boneiru en general i na e trahadónan i nan famia en partikular. Nos a sera un aña 2019 kaminda a konosé hopi aktividat sindikal i un aña den kua e bos di trahadó atraves di sindikato a keda resoná i a krea rèspèt. Aña 2020 ta e deseo pa sindikalismo sigui krese i ku e trahadó den kualkier sektor ku e ta laborá bira konsiente ku ta UNION ta hasi forsa. Komo trahadó nos mester realisá i stimulá tur nos kompañeronan pa mira sindikalismo komo un seguro pa nan posishon laboral. Un seguro ku ta perkurá pa salbaguardia ku kada ken tin su pan di kada dia atrabes di un trabou desente i honrado. Un trabou ku ta respetá derechonan laboral i ku ta krea kondishonnan positivo den kua e trahadó konsiente di su debernan por duna mas tantu na produktividat. Si komo trahadó nos kumpli kabalmente ku nos debernan i duna mas na engrandesé e kompania na unda nos ta laborá, boso por ta sigur ku sindikalismo tin forsa pa para ariba pa e prosperidat ku boso a yuda krea, un parti husto di dje ta toka boso i asina poir alsa kalidat di bida di boso i boso famia. Tin trabounan grandi pa realisá pa e klase trahadó. USIBO lo apoyá sindikatonan afiliá pa konhuntamente ku nos partnernan, esta gobièrno i sektor di dunadó di trabou traha pa duna resultado den 2020. Nos lo bin ku un kampaña fuerte pa sindikalisá e klase trahadó den tur sektor aki na Boneiru ku ainda no tin representashon sindikal. No para un banda, djòin e trein sindikal i asina huntu nos konstruí un Boneiru fuerte ku un ekonomia duradero pa krea kuponan di trabou pa Un i Tur basá riba e prinsipio di hustisia sosial.

AFBW

USIBO kier manda palabranan di felisitashon na nos kompañeronan di AFBW ku a tene un reunion general di Fundashon Mariadal dia 8 di yanüari último sumamente eksistoso. Un asistensia formal di hopi trahadó di e Fundashon i tur e shopstewardnan di e diferente kompanianan na unda AFBW tin representashon. Tabata realmente un plaser pa opservá trabounan balioso ku e direktiva nobo ku a sinta 22 di novèmber a logra realisá den apénas un luna di tempu i ku un ambishon i aspirashon pa hasi AFBW un di e sindikatonan mas grandi i fuerte i habrí pa e klase trahadó. E plannan tresé dilant riba

tereno edukashonal, sosial i di rekreashon ku e sindikato kier bai realisá den tempunan benidero a keda risibí i aproba ku un aplouso fuerte di parti di esnan presente. Re-inskripshon di miembronan eksistente i atkisishon di miembronan nobo pa asina e sindikato tin un representashon total na e Fundashon i e otro kompanianan na unda AFBW ta representá ta e meta na kua esnan presente a komprometé nan mes. Un kresemento di e kantidat di shopstewardnan ku smak i ánimo pa traha ta e señal mas fuerte ku e sindikato ta den un proseso di kresemento i refuerso serio. E resolushon unánimanente akseptá pa hasi e kas sindikal di AFBW funshoná na interes di miembresia tabata otro prueba di e dinamismo i vibe positivo ku ta reinando den e sindikato.

Situashon na BOPEC

USIBO a tuma nota ku e notisianan rondó di BOPEC ainda no ta kreando un perspektiva positivo pa ku e futuro di e kompania. Den kontakto estrecho ku e sindikato USIBO ta sigui vigilá e situashon i ta spera ku esfuerso di tur esnan envolví por krea un apertura pa asina mas pronto posibel e kompania por kuminsá risibí barkunan kargá ku produktonan petrolero i asina bira operashonal i garantisá kuponan di trabou fiho pero tambe kuponan di trabou na kontratistanan mas tambe indirektamente kuponan di trabou na kompanianan ku tin relashonnan komersial ku BOPEC.

Share This
error: Content is protected !!