UN EKSPERENSIA DI ELTON PIETERSZ I TANTE VITA

KRALENDIJK – Tante Vita algun dia pasa a bai laga nos i hopi ta e reakshon ku a keda menshoná di Tante Vita.

Elton Pietersz yu di Anne-Marie i Richard Pietersz i famia tabata na mesa djasabra selebrando fecha natal di Elton.

Anne-Marie a kuminsá konta algu ku a sosodé mas o ménos 28 aña pasa. “Elton mi yu a bai ku baiskel e tempu aya na Boutique Vita pa kumpra djins, e tempu aya ta un tienda tabatin ku ta bende djins na moda. Vita manera tur hende ta yama e tienda”, Anne-Marie a konta.

Elton a sigui: ”Mi a bai ku 300 florin ku mi tabatin despues di a bende un baiskel ku “Iwan” yu di mama Uchi i mener Omberto Augustin. Momentu ku mi a yega Vita, mi a pone mi baiskel pafó i drenta e tienda. Pas algun paña i a skohe algun djins marka “Bogart”. Momentu ku mi a yega kaha pa paga, mi sorpresa tabata ku e sèn no tei. Desesperadamente mi a bandoná e tienda, despues di a splika Tante Vita ku mi a pèrdè e sèn i no por kumpra e djinsnan. Mi a subi mi baiskel i yega kas, buska tur kaminda sin haña e sèn i a konta mi mama. Mi a konta mi mama ku mi a pèrdè e sèn, sinembargo mi no a bis’é ku mi a bai Tante Vita pa kumpra paña,” Elton a konta.

Annemarie a sigui konta debí ku Elton no ta kòrdá muchu bon kon a kontinuá. Anne- Marie: ”E dia siguiente ku Elton a kontami ku el a pèrdè sèn, mi tabata skucha radio i kisas pa kasualidat mi a tende Tante Vita menshoná na radio Voz di Boneiru ku ayera tabatin un mucha hòmber riba baiskel na tienda, i e tabata leuk i mi ke pa e pasa serka mi. Mi a warda Elton yega kas i a bis’é loke mi a tende na Radio i el a bisami e tabata ayanan bèrdat i ta einan el a sinti falta di e sèn. Nos a bèl Tante Vita i el a konta ku Jaime su esposo a yega tienda i a haña 300 florin na suela dilanti porta. Debí ku Tante Vita tabata sa ku Elton a pèrdè sèn, e tabata ke a papia kuné pa tende ta kuantu sèn i entreg’é. Tante Vita a pidimi pa skirbi un karta i menshoná loke a sosodé i e montante i laga Elton bin tuma e sèn. Elton a bai serka Tante Vita tuma sèn, paga e djinsnan ku tabata kla pone den saku, i asina kontentu regresá kas,” Anne-Marie a konta. Boutique Vita tabata sera momentu di pouze di mèrdia, sinembargo el a bisa Elton pasa i e ta atendé apesar ku tienda ta sera.

Fittipaldi Pietersz: ”Mi a haña e storia di mami i Elton interesante i a skirbié pa kompartí ku otronan”.

Share This
error: Content is protected !!