Kralendijk – Prensa tabatin e oportunidat pa papia ku Minister Knops di Asuntu Interno i Relashon den Reino, kende tabata na Boneiru pa un bishita di trabou. 

El a menshoná ku el a sinta na mesa ku gobièrnu i entre otro papia tokante puntonan di “bestuurakkoord” i mas. “E kosnan ta kana den bon direkshon loke ta hopi importante pa desaroyo di e isla di Boneiru. Awe mèrdia nos tabata presente momentu ku a hasi entrega di e kasnan na Nieuw Amsterdam i mester bisa ta un tremendo proyekto ku ta kana hopi bon. Tin bon relashon ku otro loke ta pone ku den bon harmonia loke mester sosodé ta bai mas rápido kompará ku pasado. Resientemente diputadonan i gezaghèber tabata na Hulanda i nos a elaborá riba diferente punto importante,”Knops a menshoná. Despues el a kontesta diferente pregunta entre otro tokante nos kamindanan. “Sèn no ta problema mester di plan pa por ehekutá e trabounan. Mester tene kuenta ku e kompania i hendenan ku tin pa hasi e trabou ku no ta hopi, pues ta stap pa stap tin ku bai. Otro kos ku nos tin atenshon pe ta e situashon di pobresa, kon atendé. Tokante Bopec nos a papia i ta den un situashon ku bèrdat no ta duradero i ta deliberando pa algu mas sigur riba tèrmino largu,”Knops a menshoná.
Seguidamente gezaghèber Edison Rijna a papia ku prensa i el a menshoná ku Knops tei pa un bishita kòrtiku, sinembargo di importansia.

“Nos a papia riba diferente tópiko, i kosnan ta kana den bon direkshon. Manera Knops a menshoná, sèn tei pa drecha gran parti di kamindanan, sinembargo no por hasi tur pareu. A traha un plan i poko poko ta ehekutá nan. Mayan ta kuminsá ku trabounan banda di skol ku drechamentu di kaminda.
E asuntu di kombustibel nos ta trahando pa yega na un solushon riba tèrmino largu. Den Haag ta sostené nos den e proseso i mi por garantisá ku Boneiru no ta keda sin kombustibel. Relashoná ku loke a sali den publisidat mi por bisa ku tin kombersashon tumando lugá pa loke ta trata mi posishon komo gezaghèber si ta bai alargá mi persona pa un temporada mas komo gezaghèber di Boneiru,”gezaghèber a terminá bisando.

Share This
error: Content is protected !!