KRALENDIJK – Djarason mèrdia den presensia di diferente dosente i otro invitadonan, Minister Arie Slob kende ta atendé ku enseñansa básiko i sekundario i media, huntu ku diputado Nina den Heyer a firma e di dos Akuerdo pa edifisionan eskolar na Boneiru. Promé ku a firma e akuerdo ámbos persona a dirigí palabra. Minister Arie Slob a menshoná entre otro ku el a apresiá di por tabata presente i a papia ku diferente muchanan di skol, relashoná ku e situashon na skolnan. “Tremendo desaroyo kon tur kos ta kana awor riba e isla pa loke ta trata skolnan. Ta importante ku e nivel básiko di enseñansa ta na nivel i ta bon pa mantené. Hopi trabou ta bai tin pa renobá i traha skol nobo, esei ta loke nos ta bai firma pe awe. Tur loke nos ta hasi ta na bienestar di e muchanan. Mi ta deseá pa esnan ku ta bai ehekutá i kontrolá e trabounan, pèrkurá pa kosnan bai  korekto. Firma algu ta bon, sinembargo trabou tin,” minister Slob a menshoná. Despues a papia diputado Nina den Heyer. “Awe nos a firma un kombenio pa asina tin un bista kla, kada organisashon ku ta bai atendé nan responsabilidat. 47 mion dòler tin disponibel pa hasi e trabounan di renobashon i traha skol nobo. Ta bai konstruí un edifisio nobo pa Fundashon Forma i adaptashon ‘Kristu Bon wardadó’. Ántes ‘Kolegio Papa Cornes’ ta bai renob’é i MBO ta bai haña un edifisio nobo,” diputado den Heyer a menshoná.

Share This
error: Content is protected !!