KRALENDIJK – Temporada di karnaval 2020 a inisiá riba islanan ABC manera nos a kustumbrá bisa. Un storia interesante entre 2 persona konosí den e mundu farandulero. Marvin “DJ Marvv” Abdul i Jonathan Thiel, konosí internashonalmente komo “Jeon”. “Dj Marvv” no ta hopi aktivo ku kantamentu, sinembargo e ta atendé ku tokamentu komo Dj. Interesante pa trese dilanti ku “Marvv” na 2 okashon a partisipá i gana e korona komo rei di tumba hubenil. El a partisipá na 2005 “Bai skol” i 2006 ku e tumba “Wak Bo Kaya”, i a keda korona komo rei di tumba hubenil. Tico Wanga i Juan Angela tabata esnan kende a perkurá pa e tabatin un bon tumba i e agrupashon musikal tabata “Krioyo Band”. E konosido “Jeon” kende a haña hopi fama i bira mas konosí despues ku el a presentá ku e kantika “Machika”, huntu ku e kantante internashonal J.Balvin, a topa Marvv e tempu aya riba esenario. Na 2006 nan a topa riba esenario, e aña ku Marvv a mantené e titulo komo rei di tumba hubenil. “Jeon” a sali promé finalista. Interesante pa toka e tema aki, loke a sosodé hopi aña pasa, tempu ámbos tabata mucha. No ta pa ilustrá ken ta mihó. Ámbos hóben e tempu aña tabata práktika nan tumba na Antriol Pariba, na e mes un adrès, ku agrupashon musikal “Krioyo Band”. E tempu aya festival di tumba tabata tuma lugá den stadion di Playa i e kanal di televishon di Kòrsou, “Tele Curaçao” tabata kubri e aktividat. “Jeon” i e tata Robert Thiel pa hopi aña tin un relashon ku Boneiru. Por komprondé ku tata di “Jeon” tabata toka den pasado ku frekuensia na “Karel’s Beach Bar”, i pa e motibu aki el a hasi posibel pa e yu partisipá den festival di tumba na Boneiru. Algun potrèt ta ilustrá “Marvv” ku “El Gran “Tiri” Trinidad. “Jeon” a presentá riba esenario na 2015, tempu partido polítiko MPB a tene nan promé reunion públiko i presentá e partido, kaminda e a bolbe topa “Dj Marvv” riba esenario i nan a kanta un piesa di Jeon/Biggy Boy.    

 

Share This
error: Content is protected !!