KRALENDIJK – Representante di Reino interino Jan Helmond, a rechasá e petishon di Clark Abraham di frakshon Demokrat, pa manda e desishon di Kolegio Ehekutivo pa e minister konserní pa destrukshon. Esaki relashoná ku e fiansa di 64 mion dòler ku e kompania WEB NV ke hasi. Helmond ta hasi un yamada riba tur partido pa asumí nan responsablidat. “Mester stòp di keda krea diskushon rondó di asuntunan di gobernashon i koperá ku otro pa solushoná esakinan i promové e proseso demokrátiko”, Helmond a kontestá Abraham riba su karta.

Den un karta fechá 5 di janüari 2020, Abraham na nòmber di Partido Demokrat ta pidi pa destruí e desishon di Kolegio Ehekutivo, basá riba e Lei entidatnan públiko Boneiru, Sint Eustatius i Saba. (WOLBES)

Segun Helmond ta solamente Gobièrnu Hulandes por destruí un desishon, pa e echo ku e ta kontra di lei of interes general. Tantu gezaghèber komo e representante di Reino por notifiká e minister konserní ku na nan opinion un desishon ta bin na remarke pa destrukshon. Gezaghèber ta hasi esaki via representante di Reino.

Mas aleu segun Helmond, Abraham a bisa ku Kolegio Ehekutivo no a kumpli ku su obligashon i responsabilidat di pone Konseho Insular na altura ku lo tabata bai hasi e akto di derechi privá aki. Helmond ta sigui splika ku destrukshon ta un kompetensia diskreshonario. Esei ta inserá ku e órgano gubernamental den sierto grado ta liber pa tuma sierto desishon i ku Gobièrnu Hulandes bou di tur sirkunstansia mester hasi un evaluashon kuidadoso di tur interes embolbí. “No ta tur konflikto ku derechi òf interes general ta di tal peso ku destrukshon ta hustifiká. Pregunta ta ku si loke ke logra ku destrukshon, no por ser lográ di otro forma”.

Kolegio Ehekutivo mester duna kuenta i rason na Konseho Insular tokante su maneho, i Konseho Insular tin e papel di kòntròl riba Kolegio Ehekutivo. Pa por ehekutá e tarea di kòntròl aki bon, ta importante pa Kolegio Ehekutivo duna tur informashon ku Konseho Insular tin mester pa ehekushon di su tarea. Pero Konseho Insular mes tambe por hasi pregunta na Kolegio Ehekutivo. Den e kaso aki sinembargo e representante di Reino ta konstatá ku Frakshon Demokrat no a hasi Kolegio Ehekutivo pregunta tokante e evaluashon ku el a hasi, ni a pidi Kolegio Ehekutivo pa responsabilisá su mes tampoko. ”Mi ta di opinion ku ta Konseho Insular, huntu ku Kolegio Ehekutivo, mester determiná si Kolegio Ehekutivo a aktua korekto dor di informá Konseho Insular posterior di e fiansa i e kondishonnan mará na esaki’, Helmond a skibi. E ta haña ku e proseso demokrátiko mester tuma lugá primeramente den e entidat públiko mes. Esaki no a sosodé. Konseho Insular no a hasi uso ekstensivo di tur medionan ku e tin na su disposishon i Kolegio Ehekutivo mester haña e posiblidat pa splika su karta mas detayá. Segun Helmond, ”Awor ku bo a keda sin hasi uso di e posiblidatnan ei, mi no ta mira motibu pa intervení den e forma di goberná di parti Kolegio Ehekutivo òf den e tarea di kòntròl di Konseho Insular”.

Tumando un ke otro na kuenta, Helmond ta rechasá e petishon di Clark Abraham. Na lugá di hasi esei, e ta hasi un apelashon riba tur partido pa asumí nan responsablidat. E ta konstatá ku ultimo tempu tin diferente diskushon tokante asuntunan di gobernashon den entidat publiko i e ta risibí diferente petishon di parti Demokrat. ”Aki lo mi kier enfatisá ku mester por papia tokante tipo di problemátikanan asina den gobernashon di e isla, pa asina promové e koperashon mutuo i e proseso demokrátiko”.

Share This
error: Content is protected !!