KRALENDIJK – Tur hende lo por tin nan interogantenan riba benta di un parti grandi di propiedat di nos isla na un multimilionario. Pero den e kaso aki ta trata di tereno privá, i tabata un dil privá ku gobièrnu ni Hulanda no por stroba. Asina miembronan di e delegashon di Hulanda ku resientemente a bishitá Boneiru a duna di konosé. E bosero dje delegashon hulandes sr. Jan Paternotte, a bisa ku Boneiru ta konosiendo un desaroyo hopi positivo. Kosnan ta kanando bon ku ekonomia di Boneiru. Por mira un adelanto den turismo, i tin un akuerdo ku gobièrnu di Hulanda ku proksimamente lo bai tin hopi invershon den entre otro infrastruktura. Pues e ta spera ku aki par di aña ku a hasi e invershonnan ei, ku Boneiru a konosé adelanto grandi tambe pa loke ta bida sosial.

Relashoná ku benta resientemente di un tereno basta grandi ku un hulandes multimilionario, sr Paternotte a bisa ku defakto no por bisa mashá den un dil manera esaki, pasobra ta trata aki di tereno privá. Ademas ta algu ku ta kompletamente den man di Bonerianonan mes kiko ta sosodé ku nan terenonan. Na Boneiru kada ken ta liber pa kumpra i bende loke ta di nan. E tereno aki tabata hopi aña na benta via kompanianan di ‘real estate’. Pero ki destinashon un tereno tin, ta algu ku ta keda stipulá dor di gobièrnu. Segun un otro miembro di e delegashon, por tin remarke enbèrdat riba un dil manera esaki pa motibu ku ta trata di 10 porshento di henter Boneiru, i ta algu supstansial. Pero e ta spera ku den desaroyo lo bai tene kuenta ku aspektonan di medio ambiente i mas….

Share This
error: Content is protected !!