KRALENDIJK – Djasabra 18 di yanüari e organisashon Sparta Rincon a tene un enkuentro ku prensa i na mes momentu a bendishoná nan unifòrm nobo. Ta trata di un organisashon ku ta praktiká diferente deporte, entre otro Bolas i Domino ku mira riba diferente otro deporte. Pader Ivan Dario Perez Gomez di parokia San Luis Beltran a hasi orashon na komienso di e aktividat i despues a bendishoná tur presente i e unifòrm nobo. Pader a menshoná entre otro ku e kolo di e unifòrm ta bunita i e ta ekspresá trankilidat, fortalesa i fe. Despues Evo Cicilia a hasi promé entrega di e unifòrm nobo na Ronald Haafkes, direktor di Haafkes Bouw Bonaire, kende ta e spònser prinsipal di e organisashon. Seguidamente Cicilia a dirigí palabra i entre otro el a menshoná kon Sparta Rincon a bira un realidat i e deportenan ku nan ta aktivo kuné.  Tin hopi deporte mas pa atendé ku ta pendiente. Ta trahando riba un kas pa e ekipo. Huntu ku La Fama ta bai desaroyá vèlt pariba, esta pariba di warda di polis bieu na entrada di Rincon. Ta trahando pa yega na un kas pa Sparta Rincon asina por kuminsá ku práktika di deporte paden di e edifisio. Despues Jacinta “Lenny” Janga a dirigí palabra. El a papia tokante e unifòrm loke e a diseñá pa Sparta Rincon. “Personalmente mi ta hañ’é hopi bunita. Ta hopi importante e loke e organisashon aki ta hasi i ta bai kontinuá.” Despues a dirigí palabra Ronald Haafkes di e kompania Haafkes Bouw Bonaire, spònser prinsipal di e organisashon. El a menshoná ku ta un plaser pa kontribuí na e organisashon.” Tin hopi plan pa loke ta trata e organisashon i kaminda nos por yuda, nan por konta riba nos. Éksito pa duna bon resultado,”el a terminá bisando.  

????????????????????????????????????
Share This
error: Content is protected !!