Un reportero di Radio Live 99.9 FM, a keda aserka pa un suidadano kende a ekspresá algu ku e no por komprondé dikon e sistema a kambia. Segun e suidadano el a bai atendé pago di impuesto(number)pa outo, i nan a bis’é no ta nesesario pa prueba ku el a paga seguro. Solamente mester di e papel ku a risibí na kas ku mester paga impuesto di e vehíkulo.  Ku otro palabra, no ta nesesario sigurá e outo, sinembargo loke ta importante, e impuesto di e outo mester ta pagá,”e suidadano a menshoná. El a sigui konta:”Den pasado mester a presentá ku papel di seguro bálido pa un temporada di  6 luna òf 1 aña pa por paga impuesto di outo. Awor esei no ta e kaso. Di otro banda ku tur trankilidat e persona iresponsabel ku ta deseá di manehá un vehíkulo sin ku e ta sigurá, ta fásil pa hasié. Momentu ku e persona kousa un aksidente, einan e problema ta presentá, pasobra si e tin falta i e no tin sèn pa paga, e otro persona tin ku kubri gastu pa drecha su mes outo. Un hende lo bisa ántes apesar ku mester a presentá ku un seguro bálido pa por kumpra number di outo, tabatin hende ta manehá vehíkulo riba kaminda sin paga seguro. Di e manera aki a stimulá i kontribuí pa esnan ku ta manehá un vehíkulo iresponsabel. Bèrdat polis mester kontrolá, sinembargo esun ku nan no logra atendé, ta keda kousa doló na esun hustu,” e suidadano a konta. “Meskos ku ta bai introdusí regla nobo di tráfiko, ta importante pa pone atenshon na e parti di pagamentu di number i seguro pa e ta mihó kontrolá,” el a finalisá bisando.           

Share This
error: Content is protected !!