KRALENDIJK – Último dianan ta hopi komentá tokante e vírùs nobo ku a paresé na Wuhan, China resientemente. E vírùs “corona” a kobra bida di mas o ménos 30 persona kaba i a keda detektá na desember 2019. Un kantidat grandi di hende, mas ku 800 ta kontagiá ku e malesa i tin informashon ta kore ku e vírùs ta bai di un pais pa otro. Gobièrnu chines a sera e konekshon sea pa hende drenta òf sali for di Wuhan, kaminda e vírùs a desaroyá. Merka, Colombia, Tailandia, Korea Sur, Hapon i Hulanda tambe a raportá algun kaso. E vírùs ta pèrkurá pa un persona haña hopi problema ku halamentu di rosea, keintura i tosamentu. Den kasonan serio e por resultá den pulmonia, nir ku no ta funshoná mas i por kousa morto. A deskubrí te awor ku ta trata di e mes un tipo di vírùs ku un raton di anochi tin. Hende por keda kontagiá ku e vírùs pa medio di tosamentu, nister i den aire. World Health Organisation WHO (Organisashon Mundial di salú) a keda di wak si e situashon aki mester bira unu di emergensia na nivel internashonal. Diferente Pais a kuminsa kontrola mas skèrpi i a traha un punto di kòntròl apart na aeropuerto pa pasaheronan for di China. Ta importante pa tene kuenta ku 25 janüari ta aña nobo di chines. Lo bai tin chinesnan ku ta biaha pa e Pais i regresá nos islanan ku tur e konsekuensia ku esaki por trese. Ku tur probabilidat e malesa a originá serka animalnan ku e chinesnan ta kome i awor el a pasa pa hende.  

Share This
error: Content is protected !!