KRALENDIJK – Djabièrnè pa manisé djasabra alrededor di algu pasá di 1’or di mardugá a tuma lugá un aksidente di tráfiko riba e kaminda pa bai Rincon na altura di Fontein.
Tantu Polis, Ambulans i Brandwer a keda dirigí ku urgensia na e sitio mirando ku e promé indikashon risibí tá ku e vehíkulo enbolbí despues di a aksidentá den un pida mondi, ta na kandela. No tabatin informashon si e shofùr tabata den e vehíkulo ahinda si òf no. E vehíkulo a aksidentá i keda riba su banda di bòltu.
Na yegada di e promé patruya a konstatá ku shofùr di e Toyota Vitz blanku enbolbí a logra sali for di esaki promé ku vlamnan di kandela a poderá di e vehíkulo.
Na yegada di brandwer, a logra dominá e kandela i mester a korta basta yatu i mata di sumpiña pa motibu ku ta parti patras di e outo so por a mira den e mondi será kantu di kaya.
Informashon ku Live99 a logra kompilá na e sitio ta ku e Vitz embolbí tabata moviendo direkshon di Playa i dado momentu a dal kontra spil di un otro vehíkulo ku tabata moviendo direkshon di Rincon. Aki shofùr di e Vitz a pèrdè kòntròl riba su bolante i aksidentá. No ta eksluí ku velosidat haltu a hunga un ròl den e aksidente aki. Personal di ambulans ku a akudí na e sitio a atendé ku e dama shofùr ku a risibí algun rasku na su kurpa, pero danki Dios nada grave i di lamentá.

FUENTE: LIVE 99 FM

Share This
error: Content is protected !!