DIES (10) MOTIBU PA UN TRAHADÓ AFILIÁ NA UN SINDIKATO.

KRALENDIJK – Hopi biaha bo ta skucha trahadó puntra nan mes ki balor tin pa ta afiliá na un sindikato. Tin asina tantu motibu pakiko sindikalismo ta importante. Hopi di e derechonan ku awendia nos komo trahadó ta gosa di dje, ta pa motibu di luchanan fuerte di sindikalismo. Ata ki 10 motibu ku ta hustifiká pa trahadónan den un empresa afiliá na un sindikato.

1. Unidat ta forsa

Sindikato ta perkurá pa trahadónan tin un bos kolektivo fuerte pa komuniká ku gerensia nan deseonan, nan malkontentu frustrashon. Ku un bos kolektivo bo ta logra mas rèspèt.

2. Sindikato ta negoshá mihó kondishonnan di trabou.

Tur aspekto di e bida di trabou mester ta tema pa diskushon i akuerdo entre trahadó i dunadó di trabou bou di protekshon di un sindikato. Lidernan sindikal bon entrená i formá ta dirigí e negosashonnan na nòmber di e trahadó. P’esei ta importante pa den un forma kontinuo ta duna formashon na lidernan, shòpstewardnan pa mehorá nan konosementu riba tereno di desaroyonan ekonómiko i konsekuensia di esaki pa e trahadó. Ta bon pa duna formashon tambe na miembronan pa asina nan mes tambe ta bon ekipá pa ku nan obligashon- i derechonan riba boka di trabou.

3. E trahadó ta haña mas dia di vakashon den un kompania kaminda tin sindikato.

Sindikatonan a logra ku trahadónan a haña nan dia di vakashon pagá. Na Inglatera e trahadó den sindikato tin mas o ménos 25% mas dia di vakashon ku esun ku esnan ku no ta den sindikato (situashon di Boneiru).

4. Den un kompania e trahadó ku ta den sindikato por gana mas ku esun ku no ta den sindikato.

Negosashonnan kolektivo ta yuda pa e salario di e trahadó keda adaptá na oumento di kosto di bida, pero tambe ku ta adaptá su salario a base di balorasisashon di su prestashon na trabou. Un kompania ku ta bai dilanti a base di bon produktividat di e trahadó tin e deber di kompartí e “ganashi” ku e ta hasi ku su empleadonan.

5. Bo ta haña mas dia ora bo ta na estado. E tata tambe ta haña dia di vakashon ora su yu nase.

Ta trahando pa amplia e dianan di vakashon di embaraso pa e mama i tambe pa e tata i ankra esakinan den lei.

6. Tin mihó seguridat di trabou.

Esaki ta un punto di hopi preokupashon, esta seguridat di e trahadó na boka di trabou. Tin reglanan ku ta rekerí ku e dunadó di trabou ta tene kuenta ku seguridat di e trahadó ora e ta ehersé su trabou. Sektornan ku aktualmente tin atenshon ta sektor di konstrukshon, sektor di buseo, sektor di horeca. Mester amplia esaki pa mas sektor.

7. Bo tin un hende den bo banda or abo ta den nesesidat.

Ser miembro di un sindikato, bo ta parti di un organisashon mas grandi I bo tin sosten di e sindikato ora bo tin mester.

8. Sindikatonan ta lucha pa oportunidat igual na boka di trabou.

Nan ta para pa igual pago pa igual trabou i ta kontra diskriminashon riba boka di trabou. Sindikalismo lo oponé tur klase di diskriminashon riba flur di trabou. Atenshon speshal mester pa esnan femenino, pero tambe pa esnan ku tin un òf otro deshabilidat. Derecho riba un trabou desente kontra un pago husto ta keda prioridat di sindikalismo.

9. Den kompanianan kaminda tin sindikato tin mas seguridat riba trabou.

Tin ménos aksidente ya ku sindikato ta para riba seguridat na boka di trabou.

10. Sindikato ta ofrese serviso i konseho legal na su miembronan.

USIBO ta trahando duru pa realisá e bentana di asistensia pa tur trahadó. Opviamente si bo ta miembro di un sindikato bo lo tin mas benefisio di e servisio aki ku si bo no ta miembro.

SINDIKALISMO ta komparabel ku un seguro ku bo ta sera pa si durante bo bida di trabou algu pasabo. Tambe sindikalismo ta lucha pa or abo stop di traha bo por hiba un bida tránkil finansieramente. Pues e importansia pa ta den un sindikato ta mas ku kla. Kiko bo ta warda pa afiliá. Stimulá bo kompañero(a) i realisá ku den un sindikato bo ta protehá i bo tin benefisionan kolektivo ku bo so no por logra.

Share This
error: Content is protected !!