Kralendijk – Na aña 1990 riba e fecha 1 di yanüari William Gregorio Piar mihó konosí komo Willy, a drenta servisio di gobièrnu di Boneiru na e Instituto di deporte Indebon. Willy a keda enkargá ku e proyektonan di edukashon físiko na skolnan básiko i deporte den bario. Willy tabata usa su kreatividat dor di traha bala nan di mea pa asina e muchanan por a praktiká e deporte di bala, mirando e limitashon ku tabatin e tempu ei. Durante di e trinta añanan Willy i su koleganan a sigui diferente kurso relashoná maneho di deporte na nivel. Durante añanan Willy a duna gimnasio na Reina Beatrix,Kolegio Papa Cornes i skol San Bernardo, i aktualmente Willy ta duna gimnasio na Kristu Bon Wardador. Den su funshon Willy a funshoná komo lider di tim, kordinadó di deporte, i ta enkargá ku e proyektonan di deporte den bario, akohida despues di skol, durante diesshete aña Willy a kordiná deporte eskolar lokal i weganan Interinsular entre Aruba, Boneiru i Kòrsou. Hefe di Indebon sr.Peter Silberie a trese dilanti, ku ta un plaser pa traha ku un tim profeshonal den Indebon, por mira ku Willy i su otro koleganan a duna i pone rèspèt ku awendia por mira hóbennan ku a i ta destakando riba diferente ramo di deporte riba nos isla i den eksterior. Finalmente Peter a felisitá Willy i su famia ku su trinta aña sirbiendo komunidat boneriano i Willy semper ta kla pa yuda su koleganan pa asina trabou nan sali na benefisio di nos hóbennan. Diputado enkargá ku deporte sr.James Kroon na nòmber di Gobièrnu di Boneiru a felisitá Willy i su famia i koleganan pa e sosten i e dedikashon na su trabou kual ta na bienestar di nos komunidat, i ku Willy sigui ku e bon trabou ku la desplegá durante e trinta añanan, pa klousura e parti ofisial diputado James Kroon na nòmber di gobièrnu di Boneiru den presensia di Peter Silberie i Allyson Pourier a entrega Willy e sertifikado di rekonosimentu i un gratifikashon pa e añanan.

Share This
error: Content is protected !!