KRALENDIJK – Un suidadano prekupá ta puntra kon honesto kuerpo polisial na Boneiru ta? Esaki ta loke e suidadano a skirbi den un karta entregá na Radio Live 99.9 FM. ”Komo un bon suidadano, yu di tera mi ta hopi prekupá ku e manera kon kuerpo polisial di Boneiru ta atendé su maneho. Un kuerpo mester tei pa sirbi i protehá e suidadano. Un kuerpo no mester tei pa protehá e malechor. Un kuerpo mester kontrolá nos leinan ku nos tin i kaminda kualke suidadano falta ku nos leinan, e kuerpo mester aktua di un forma korekto i konforme preskripshon di nos leinan. Mester tin trato igual pa tur suidadano, sino nos ta papia di deskriminashon. Ta imposibel si ami hasi algu kontra lei, hustisia ta atendé ku ami i si un otro persona kometé algu kontra di lei, e mesun kuerpo polisial ta bira kara otro banda i hasi manera ku nan no sa ku nada a sosodé,” e suidadano ta menshoná. El a sigui bisa: ”Ku esaki mi ta referí na e suseso di fin di aña 2019 den mi bario Tanki matrimonio kaminda e hefe di departamento di reshèrshi a maltratá su señora. Dos bia riba e mesun anochi, su mes koleganan mester a bini na e sitio pasobra e kos a sali totalmente for di man. 

No ami so, sinembargo mas persona den bario a tende e señora grita na bos haltu, ekspresando su mes dor di bisa ku ta pasombra e miembro di kuerpo polisial aki tin hende ku man riba su kabes, i e, esta e señora ta latino, pa e motibu aki nada no ta bini afó. Por sierto no ta promé bia ku e miembro di kuerpo polisial aki ta maltratá un pareha ku e ta kompartí bida kuné.

Mayoria persona ku tabata na kas e anochi, por a tende e mesun gritunan ku ami a tende. E mesun señora na bos haltu tabata grita bisando “Bo ta kere un persona ku stima su pareha ta maltrat’é di e forma aki?” Hopi kos e hefe di reshèrshi aki a hasi durante e anochi. Na final tabata parse manera ta kuerpo polisial ta kontra di e señora ku den su doló tabata trata na splika kiko a pasa pa un bia mas na man di e persona. Na final e hefe di reshèrshe a bandoná e sitio manera nada no a pasa, esta ku kara na laria pasobra niun hende ku a bini pa atendé ku e problemátika ku tabatin, no por hasi nada. 

Mi a komprondé ku e señora latino tabatin un kòrtá na su brasa. Un bia mas mi ta puntra mi mes unda hustisia a keda? Hustisia ta konta solamente pa e suidadano ku no ta forma parti di kuerpo polisial? Mi no ke generalisá, sinembargo parse ku miembronan di kuerpo polisial di Boneiru ta riba tur lei ku ta eksistí. Nan por hasi i deshasí manera ku nan haña ta bon! Manera ku un suidadano djis pasa e liña, ta kla pa atendé ku man duru, òf duna un but, siendo ku un di e opshonnan ku polis tin, ta duna un “waarschuwing”. 

Tur kos di tur suidadano ta bira notisia, ta bini na klaridat i sali den korant òf na radio. Esun di e hefe di departamento di reshèrshi si, a keda bon skondí te ku e dia di awe. E ta traha normal i esei no ta algu korekto. Meskos ku nos ta eksigí trato igual di Hulanda sin deskriminashon, meskos e pueblo di Boneiru ta eksigí trato igual pa kada suidadano sin deskriminashon i sin privilegiá otro, pasobra nan ta forma parti di kuerpo polisial di Boneiru.

Un biaha mas nos mes ta laga mustra ku ora duna nos mes hendenan chèns pa sinta riba puestonan haltu, nos ta kuminsá halusina i kere ku ta shelu nos a yega, i ku nos por hasi i deshasí manera ku nos haña ta bon, pasobra nada no ta bini afó, i tur kos ta keda bon skondí. 

Mi ta spera ku e situashon aki lo mira lus di dia, i ku por ta honesto sin tapamentu di kos pa kolega. Mi ta spera ku esunnan na kabes ta honesto ku nan mes, pa habri porta i laga investigá e situashon. Mirando ku kuerpo polisial sa bon kla ku no ta promé biaha ku e persona konserní ta maltratá un pareha ku e ta forma bida kuné. 

Un investigashon lo por yuda e persona konserní, pa evitá ku den futuro por tin situashon lamentabel ku por tuma lugá. Kòrda ku tin miembronan di kuerpo polisial ku ta bai kas ku nan arma. 

Hefe di kuerpo sali i duna kara. Meskos ku ta tene enkuentro ku prensa pa mustra kon bon ta solushoná kaso, duna kara awor i stòp di skonde e bèrdat. Òf ta ora ku morto kai e ora ei ta mira e gravedat di e situashon? 

No ta resta nos nada mas di sinta warda i wak ki dia kuerpo polisial lo bisa algu tokante di e suseso,” suidadano prekupá a tèrminá su karta bisando.

Radio Live99 a tuma kontakto ku bosero di kuerpo polisial relashoná ku e kaso aki i a haña e siguiente reakshon: Kuerpo Polisial Hulanda Karibense ta na altura di e kaso menshoná i sigun prosedura a start un investigashon intèrno riba esaki. KPCN no sa komuniká kasonan intèrno ku prensa, alomenos si ta trata di un kaso di tal gravedat ku ta prosedé pa detenshon di e sospechoso. E kaso aki lo no ta un eksepshon riba e regla aki. Na e momentunan aki ahinda tin un investigashon andando riba e kaso aki.

Share This
error: Content is protected !!