KRALENDIJK – E selebrashon relashoná ku dia internashonal di duana na Boneiru a kontinuá djadumingu anochi, despues ku parti mainta a hisa bandera i santu sakrifisio di misa. Anochi e selebrashon final tabata na Landhuis Wanapa. Direktora di Belastingdienst CN Anneke van Breemer, a hiba palabra i yama tur invitado bonbini. El a menshoná ku ta spera di kontinuá ku e tipo di aktividatnan aki. Despues a papia e Hefe di Duana Aruba, Sr Roderick Croes. El a menshoná den su diskurso ku nan tarea no ta algu fásil, esta pa kontrolá nos portanan kontra kosnan ilegal. Despues a papia e direktora di duana Kòrsou sra. Soraya Pols Strickx, kende entre otro a yama pabien na duaneronan ku e tremendo selebrashon. E presidente di STRAF Juan Lourens tambe a papia, i Edward Maduro di sindikato Aruba. Tur a gradisí otro pa e tremendo aktividat organisá na Boneiru pa duaneronan i pa mantené e union. E islanan a interkambiá un rekuerdo chikitu ku otro.
Despues tabatin premiashon di e kompetensianan ku a tuma lugá den diferente ramo di deporte entre duaneronan di Aruba, Boneiru i Kòrsou. E anochi a kontinuá ku un sena i despues Dj Ash i Fenty Music a animá e duaneronan ku a baila i disfrutá di e anochi prepara pa nan.

Aki ta sigui e resultadonan:

Vòlibòl.

Kòrsou ta kampion i Boneiru supkampion.

Bolas Krioyo.

Boneiru a bira kampion i Aruba supkampion.

Tiru.

Boneiru kampion i Kòrsou supkampion.

Sòftbòl.

Kòrsou a titulá kampion i Boneiru supkampion.

Dominó.

Aruba a titulá kampion i Kòrsou supkampion.

Pabien na e isla i paisnan ku a kai den premiashon di e siman di Duana 2020.

Share This
error: Content is protected !!