KRALENDIJK – E aña aki, 27 di novèmber 2020 Parke Libertat – James Finies (konosí komo Parke Públiko) lo kumpli 15 aña di eksistensia. Presidente di e Fundashon We Dare To Care (WDTC), Davika Bissessar, a bisa ku nan ta sinti ku nan a kumpli i logra nan ophetivo 100% pa e komunidat boneriano, spesialmente esnan di ménos rekurso. “Nos a krea, konstruí i brinda servisio komo sitio di rekreashon grátis desde 2005, momentu ku no tabatin niun sitio di rekreashon ya pa 20 aña kaba, un echo tristu i falta di bon gobernashon i falta di vishon di nos gobièrnunan lokal.” Fundashon WDTC, James Finies i Davika Bissessar, di akuerdo ku nan lema di “Mantené nos yunan for di kaya i for di prizòn”, a krea un lugá, un sitio di rekreo i un parke, kaminda e muchanan sin bos na Boneiru por a bini sin ningun restrikshon ni kosto. “Un liña di pensamentu ku sigur nos ke mantené ku entrada grátis den e sistema defekto i ilegal akí ku e muchanan i nan famia a haña nan aden desde 10-10-10. Den nos vishon 15 aña pasá, tambe nos a inkluí fondonan struktural segun AMFO, gobièrnu i Fundashon WDTC a akordá.” Apesar di tur e dokumentonan relevante ku Fundashon WDTC tabatin, tantu gobièrnu hulandes komo lokal no a mira e fundashon i su meta komo prioridat. Tur esaki apesar ku kada aña e fundashon tabata manda karta pa e gobièrnu lokal, Parlamento Hulandes, tambe personal pa Reina Beatrix na 2006 i 2010 ora el a bishitá Boneiru i despues personal pa Rei Willem Alexander na 2013. “Nos a oponé tambe kontra pagamentu di impuesto riba propiedat inmóbil (‘vastgoedbelasting’) i di Den Haag nos a risibí un karta ku nan no por hasi nada.”

Desde 2005, e dos aktivistanan na base di e fundashon, James Finies i Davika Bissessar, a resistí tur difikultat pa mantené e parke aki den bon estado; pa por ta e promé parke di rekreo despues di 20 aña riba e isla, apesar di leinan fiskal nobo, impuesto riba propiedat inmóbil, oumento di impuesto riba e tereno, oumento di gastunan di KVK, oumento drástiko di e kuentanan di awa i koriente, oumento di gastunan di banko, etcetera. Sin apoyo finansiero di ningun grupo, lokal o hulandes, pasobra tantu gobièrnu lokal komo hulandes, desde 2005 te ku 2020, apsolutamente no a finansiá. Pero Stinapa, Forsa, Jong Bonaire, Bonaire Youth Outreach, Animal Shelter, Donkey Sanctuary i otronan si ta haña sèn. Dikon e parke di rekreashon aki no? “No tin niun sitio di rekreashon manera di nos, niun sitio kaminda ku muchanan por hunga fo’i peliger manera Parke Libertat. Asin’aki ta un bèrguensa pa bisa ku nos ta parti di Hulanda.”

Sin apoyo finansiero struktural i apesar dje echo ku nos gobièrnu lokal a intentá i proponé pa Fundashon Mariadal tuma e parke, kasi 10 aña a pasa. Lamentablemente Fundashon We Dare To Care awor ta haña su mes obligá na introdusí i mantené un ‘Programa di Reflekshon’ pa por preservá i mantené e fasilidat akí, ku den nan vishon, tambe mester pasa pa generashon tras di generashon pa 100 aña i mas.

“Nos ta mantené nos vishon di a konstruí e parke pa tur hende, spesialmente pa e grupo vulnerabel den nos komunidat. Pa ku esnan sosialmente ménos fortuná, por tin un sitio pa hunga i rekreá i por sigui hasi uzo di e parke di forma grátis, miéntras ku e famianan ku si por paga, ta koperá i kontribuí pa yuda nos fundashon mantené e parke i evitá ku e ta kai den dekadensia I desórden manera Playa Pabao ku resientemente tabata den notisia pa esaki. Esaki ta e úniko forma ku nos ta mira ku nos por sigui operá e parke di akuerdo ku e vishon i metanan di Fundashon We Dare To Care.”

E eksigensianan di entrada pa Parke Libertat, tambe konosí komo Parke Públiko, desde 1 di yanüari 2020:

· Famianan di ménos rekurso i programanan despues di skol di gobièrnu: entrada anual gratuito.

· Privilegio spesial i ta riba e tarifa / nivel di famia konforme NIBUD: pa dia $.1/ pa luna $10 / pa aña $110.

· Tereno di rekreashon i parke ta habri di djaluna te ku diadomingo, di 3:00 p.m. pa 7:30 p.m. òf yama / whatsapp: +599 9 7864576.

Davika Bissessar – Presidente di Fundashon We Dare To Care

James Finies – Visepresidente di Fundashon We Dare To Care.

Share This
error: Content is protected !!