KRALENDIJK – Djabièrnè atardi Kuerpo di brantwer Hulanda Karibense, BKCN, a entrodusí nan vehíkulo nobo i super sofistiká na kazèrne di brantwer. Ta trata di un Oshkosh Global Striker, manera su nòmber ofisial ta. Den presensia di bomberonan i diferente invitado a tuma lugá e aktividat kaminda algun persona a dirigí palabra. Komandante General Interino di BKCN, Albert Gieling, a papia i a menshoná kon importante ta e tarea i responsabilidat ku e bombero tin. 24 ora pa dia, 7 dia di siman nan mester ta pendiente. E bombero sèmper mester ta atento i akudí rápido na e sitio di insidente i aktua korekto. Mester di hende ku bon konosementu i bon ekipá. E mashin nobo ta hopi amplio ku diferente posibilidat,“ Gieling a splika. El a sigui konta ku e trùk nobo ta avisá na momentu ku tin algu ku no ta funshoná korekto. Pues un mekániko no mester buska e problema, e trùk mes ta indiká na unda tin problema i pa drech’é. E trùk ta sofistiká, rápido, fásil pa manehá pero kostoso, sinembargo e ta di nesesidat, Gieling a tèrminá bisando.  
Despues a dirigí palabra Jos Hillen, direktor di Bonaire International Airport (BIA) i el a menshoná ku ta bai tin desaroyo pa kresementu.
Gezaghèber Edison Rijna tambe a dirigí palabra i a menshoná entre otro ku Boneiru ta poko mas sigur awor ku e trùk nobo. “Ta hopi importante pa tin trùk nobo, edifisio grandi, sinembargo spesialmente e trahadónan. Ku hendenan bon prepará, nos por ta sigur pa loke ta trata seguridat. Spera ku ta usa e trùknan solamente pa keinta nan mainta trempan riba pista di aterisahe na aeropuerto i nada mas,” gezaghèber Rijna a tèrminá bisando.  
Seguidamente a papia Hubert-Jan Albert na nòmber di Minister di Seguridat i Hustisia komo manehadó di e kuerpo di brantwer den Reino, kende tambe a gradisí tur presente i pa e bon desaroyo. Despues Pader Ranolfo Goneda a hasi orashon i bendishoná e trùk nobo pa paga kandela.

Share This
error: Content is protected !!