KRALENDIJK – Djadumingu anochi a tuma lugá e aktividat kaminda partisipantenan pa festival di tumba 2020 por a inskribí. Diferente tumbero a akudí na e sitio, na sede di karnaval situá na sentro di bario Amboina. Durante e aktividat algun persona a dirigí palabra entre nan presidente di “KLAVE” Gabriel Pourier i diputado Nina den Heyer. Presidente di KLAVE di un manera sorpresivo a anunsiá e personanan, kende festival di tumba 2020 ta dediká na dje. Esaki nèt na momentu ku e personanan aki a bin pa kompaña un kantante kende nan ta kompositá i areglá tumba p’e. E aña aki a skohe tata i yu. Juan Angela i su yu Garrick. Dos persona kende a partisipá hopi biaha den Festival di Tumba i a bai ku e korona tambe na mas ku un okashon. Último añanan dedikando nan tempu mas na areglá i kompositá tumba. Juan i Garrick a gradisí Fundashon Klave pa e sorpresa i a anusiá ku tata i yu lo partisipá komo kantante 2021 den Festival di Tumba Boneiru. Un total di 12 tumba repartí den shete agrupashon musikal a keda inskribí pa Festival di Tumba Grandi 2020 i 3 Tumba Hubenil ku lo keda kompaña pa Krioyo Band. Festival di Tumba Boneiru lo ta djasabra awor 8 di febrüari den Stadion Antonio Trenidad na Rinkon, kuminsando pa 6’or di atardi. Mantel i korona pa e Rei di tumba grandi i Rei of Reina di tumba hubenil 2020 ta diseña pa Angelo Domacassé.

Kombinashon di potrèt di e aktividat i nòmber di e partisipantenan di tumba hubenil i grandi.      

Share This
error: Content is protected !!