USIBO TA OPINÁ TOKANTE SITUASHON DI BOPEC

KRALENDIJK – Durante un siman staf i personal di Bopec a drenta akshon, garantisando den un forma responsabel si ku e seguridat di e terminal a keda salbaguardiá. E akshonnan ku e trahadónan a hiba, sostené pa nan sindikato BPWU tabata dirigí riga e siguiente puntonan.

1. Muestra di solidaridat pa e forma kon direktiva di BOPEC a retirá e gerente sr. Manuel, kende por sierto mirando e situashon ku ela bin haña BOPEC di akuerdo ku e trahadónan a hasi un bon trabou i no a meresé e trato risibí.

2. Mirando e situashon físiko di e planta pero tambe e situashon finansiero, trahadónan a eksigí pa haña klaridat riba.

– Kontinuidat di operashon di e terminal mirando e situashon di mantenshon di e terminal bou di supervishon di ILT, ku ta e inspekshon independinete di ministerio, ku ta vigilá tantu e seguridat di e personal komo di medio-ambiente.

– Garantia di nan pago di salario tur luna mas kumplimento di e CAO.

3. Mirando ku pa fin di mart e lisensia di OFAC lo terminá, trahadonan a realisá ku lo no por sigui bende produkto den e tankinan i ku esaki e fondonan ku tabata riba un kuenta di banko separá ku e meta pa paga entre otro salarionan lo por kore peliger.

4. Tambe trahadónan kier a risibí klaridat riba e lisensianan di operashon i marítimo ku lo terminá fin di ougùstes i ku si no alargá esakinan, ki konsekuensia esaki por tin pa kontinuidat di operashon di e terminal.

5. Ta un echo ku e situashon finansiero di BOPEC ta trese kuné ku lo tin kreditornan ku ta den un situashon di inseguridat ku nan lo risibí pago pa nan servisionan i/o produktonan ku nan a entregá na BOPEC. Pa ku esaki e trahadónan kier a risibí klaridat pa loke ta posibilidat di embargo o den un kaso ekstremo bankarota di e kompania i ki konsekuensia esaki tin pa BOPEC.

6. Nombramento di un gerente nobo, ku no ta gosa di konfiansa di ni staf, ni personal ni di e kontratistanan. Trahadónan a konsiderá e nombramento aki no prudente den e situashon di tenso, inseguridat ku ya ta eksistí riba e terminal.

USIBO a tuma bon nota di e puntonan aki i ta di opinion ku nan tur a hustifiká e akshon, sigur pa loke ta trata puntonan 2 te ku 5. Aki ta trata di seguridat di trabou i pago pa e trabou ku ta un derecho sagrado di e trahadó.

Na momento ku trahadónan no a risibí un reakshon satisfaktorio riba e punto 2 te ku 5, a pidi asistensia di USIBO kende despues di a risibí tur e informashon serka e trahadónan, a hasi un petishon di urgensia primeramente ku gezaghèber ku e taskforce ku ta representá ministerio di Infrastruktuur en Waterstaat, bou di kua e departamento di ILT, inspekshon ta kai.. Despues di esei tambe a pidi un reunion ku gerensia di BOPEC. E eksigensia di USIBO tabata pa trese klaridat sin bira rondó di e barí riba e puntonan ku e trahadónan a drenta akshon pe.

Despues di a haña e klaridat stret pa loke ta e situashon di BOPEC, mirá for di e punto di bista di e taskforce i ministerionan i di part di gerensia pa ku kontinuidat di e operashon i garantia di pago di salario i otro kondishonnan laboral, a konsehá pa terminá e akshonnan ya ku e meta a keda alkansá. Djabièrnè atardi 4’or riba instrukshon di nan sindikato trahadónan ku ta traha warda a reanudá nan trabou, miéntras ku e otro trahadónan lo hasi esaki djaluna 3 di februari pa 07.30 di mainta. E situashon di BOPEC ta keda uno di atenshon kontinuo te ora esaki normalisá.

USIBO kier felisitá e sindikato ku e forma responsabel ku nan a sostené e lucha di e trahadónan i tambe e forma responsabel ku nan a logra konvensé e trahadónan pa terminá e akshonnan i pa reanudá nan trabou i nan sigui gana nan pan di kada dia i no trese esaki na peliger. Un pabien tambe na e trahadónan ku a sali sostené nan gerente, apesar ku esaki no ta miembro di e sindikato, pero tambe un pabien na staf di BOPEC ku a sostené e trahadónan den e puntonan riba kua nan tabata ke klaridat, ya ku e puntonan aki tabata den interes di e staf tambe. Históriko ta ku sin distinkshon di posishon i funshon trahadónan di BOPEC a uni i haña resultado. Ku esaki a keda demonstrá un biaha mas ku UNION TA HASI FORSA..

Un danki USIBO ta manda pa e sindikato, staf i trahadónan pa a duna USIBO e konfiansa pa por a duna asistensia. Un danki tambe na gezaghèber, su konseheronan i tambe gerente di BOPEC ku a reakshoná positivo riba e yamada di USIBO pa sinta huntu i krea e klaridat rondó di BOPEC, pero tambe e kompromiso pa hasi tur loke ta den nan alkanse pa tene e terminal operashonal i asina garantisá kuponan di trabou i e kontribushon positivo na ekonomia di nos isla.

Share This
error: Content is protected !!