KRALENDIJK – Gezaghèber Edison Rijna ta konsehá miembronan di Konseho Insular pa bai di akuerdo ku e proposishon pa stipulá den e Ordenansa di Tráfiko riba karetera, ku winshil i glasnan dilanti, parti di shofùr i pasahero, mester laga por lo ménos 55 porshento di klaridat pasa. No ménos, ya ku esei por trese tráfiko den peliger. Asina el a bisa miembronan di e Komishon Fiho di Planifikashon i Desaroyo den sala di reunion di Konseho Insular. Ta trata di kontinuashon di e reunion di e komishon ku a keda di skòrs dia 27 di novèmber 2019. A skòrs e reunion pa asina e miembronan por a haña mas klaridat i kontesta riba preguntanan ku tabatin. Dia 20 di desèmber Kolegio Ehekutivo a kontestá e preguntanan. 

E proposishon pa stipulá e mínimo kantidat di klaridat ku e glasnan mester laga pasa den un vehíkulo ta loke ku frakshon di FSP a hasi aña pasá. “Mi no ta konsehá pa bai di akuerdo ku ménos, ya ku esaki ta peligroso den sierto sirkunstansia”, segun Rijna. Mester hasi adaptashon den e ordenansa mas rápido posibel, ya ku esaki ta drenta na vigor entrante 1 di mart 2020. 

Riba petishon di e miembronan, gezaghèber Rijna, komo e persona enkargá ku mantenshon di órden i siguridat, i miembro di e komishon ku ta konsehá gobièrnu den e asuntu aki, a bolbe pasa dor di e kontestanan. Na luna di ougùstus 2019, e ordenansa mester a drenta na vigor, pero a duna dos luna di grasia pa asina pueblo por a kustumbrá ku e lei i regla nan nobo. Sinembargo Triángulo Hudisial a disidí, mirando ku tabatin hopi pregunta i tur kos no tabata kla, pa alargá e periodo aki te 1 di mart 2020. “Awor si tur kos ta kla i ‘in place’ pa entrante 1 di mart 2020 e Ordenansa di Tráfiko riba karetera’ drenta na vigor”, gezaghèber Rijna a sigurá e miembronan di e Komishon Fiho. Kuerpo Polisial Hulanda Karibense tambe ta kla i tin aparato pa entre otro tèst rosea i tambe pa midi e kantidat di lus ku ta drenta den un vehíkulo.

Ta konsiderá e outo nan di gòlf, e asina yamá ‘golf cart’, komo un vehíkulo ku ta tuma parti den tráfiko i mester kumpli ku tur regla di tráfiko. pues nan mester tin plachi di number i faha di siguridat. Pa e asina yamá ‘scoot mobile’ pa persona nan ku desabilidat, no mester di reibeweis. Nan por kore riba karetera, kaminda pa baiskel i tambe riba alsera. 

Ta bai kuminsá kontrolá ekiponan pisa, ku ta transportá karga manera santu i piedra, si nan ta tene nan mes na regla di velosidat i ta sòru pa nan karga ta bon tapá pa evita molèster den bario nan. Rijna a bisa ku diferente departamentu ta trahando riba rutanan alternativo pa transporte pisá, pa evita ku tráfiko pisá ta pasa den barionan residensial.

Share This
error: Content is protected !!